ନୂଆଦିଲ୍ଲୀ: ସ୍ତନ କର୍କଟ ରୋଗର ଆଗୁଆ ନିରୂପଣ ପାଇଁ ମହିଳାମାନଙ୍କ ମଧ୍ୟରେ ସଚେତନତା ସୃଷ୍ଟି ଲାଗି ସ୍ୱାସ୍ଥ୍ୟ ଓ ପରିବାର କଲ୍ୟାଣ ସଚିବ ପ୍ରୀତି ସୁଦନ ଗୁରୁତ୍ୱାରୋପ କରିଛନ୍ତି। ନୂଆଦିଲ୍ଲୀରେ ଏକ କାର୍ଯ୍ୟକ୍ରମରେ ଉଦବୋଧନ ଦେଇ ସେ କହିଛନ୍ତି, ସରକାର କର୍କଟ ରୋଗର ଚିହ୍ନଟ ଓ ଶସ୍ତାରେ ଚିକିତ୍ସା ପାଇଁ ଅହରହ କାର୍ଯ୍ୟ କରୁଛନ୍ତି। ସୁଦନ କହିଛନ୍ତି, ଉଚ୍ଚ ରକ୍ତଚାପ, ମଧୁମେହ ଓ ମୁଖ, ସ୍ତନ ଏବଂ ଗର୍ଭାସୟ କର୍କଟ ରୋଗ ସମେତ ସମସ୍ତ ଅଣସଂକ୍ରାମକ ରୋଗର ଯାଞ୍ଚ ଦେଶର ୨୭ହଜାର ସ୍ୱାସ୍ଥ୍ୟ ଓ ୱେଲ୍ନେସ କେନ୍ଦ୍ରରେ କରାଯାଉଛି।
ସେ କହିଛନ୍ତି, ସରକାର ୨୦ଟି ତ୍ରିସ୍ତରୀୟ ସେବା କେନ୍ଦ୍ର ସ୍ଥାପନ କରିଛନ୍ତି, ଯେଉଁଗୁଡ଼ିକରେ ଏହିଭଳି ଅଣସଂକ୍ରାମକ ରୋଗଗୁଡ଼ିକର ଚିକିତ୍ସା କରାଯାଇ ପାରୁଛି। ସୁଦନ କହିଛନ୍ତି, ସ୍ତନ କର୍କଟ ରୋଗର ସମ୍ପୂର୍ଣ୍ଣ ରୂପେ ଚିକିତ୍ସା କରାଯାଇ ପାରିବ ଓ କୌଣସି ମହିଳା ସ୍ତନ କର୍କଟ ରୋଗରେ ପ୍ରାଣ ହରାଇବା ଉଚିତ୍ ନୁହେଁ।
