ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସନ୍ତାକାଲିଠାରୁ ପାଞ୍ଚଦିନ ପାଇଁ ଇଣ୍ଡୋନେସିଆ ଓ ସିଙ୍ଗାପୁର ଗସ୍ତରେ ଯିବେ। ମଙ୍ଗଳବାର ୨୯ ତାରିଖରୁ ୩୧ ତାରିଖ ପର୍ଯ୍ୟନ୍ତ ସେ ଇଣ୍ଡୋନେସିଆ ଗସ୍ତରେ ଯିବେ। ସେହିପରି ମଇ ୩୧ ତାରିଖରୁ ଜୁନ୍ ୨ ତାରିଖ ପର୍ଯ୍ୟନ୍ତ ସେ ସିଙ୍ଗାପୁର ଗସ୍ତ କରିବେ। ବୈଦେଶିକ ମନ୍ତ୍ରଣାଳୟରୁ ଜାରି ଏକ ବିଜ୍ଞପ୍ତିରେ କୁହାଯାଇଛି ଯେ, ଶ୍ରୀ ମୋଦି ୩୧ ତାରିଖରେ କ୍ୱାଲାଲମ୍ପୁରରେ ଅଳ୍ପ ସମୟପାଇଁ ରହି ମାଲେସିଆର ନବନିର୍ବାଚିତ ପ୍ରଧାନମନ୍ତ୍ରୀ ମହାଥିର୍ ମହମ୍ମଦଙ୍କୁ ଭେଟିବେ।
ପ୍ରଧାନମନ୍ତ୍ରୀଙ୍କ ଜାକର୍ତ୍ତା ଓ ସିଙ୍ଗାପୁର ଗସ୍ତ ସମୟରେ ସେଠାକାର ନେତାମାନଙ୍କ ସହ ଦ୍ୱିପାକ୍ଷୀୟ ବୈଠକ, ପ୍ରତିନିଧି ମଣ୍ଡଳସ୍ତରୀୟ ଆଲୋଚନା, ଉଦ୍ୟୋଗପତିମାନଙ୍କ ସହ ବୈଠକ ଓ ପ୍ରବାସୀ ଭାରତୀୟମାନଙ୍କୁ ଉଦ୍ବୋଧନ ଦେବାର କାର୍ଯ୍ୟକ୍ରମ ରହିଛି।
ସିଙ୍ଗାପୁରରେ ଶ୍ରୀ ମୋଦି ସପ୍ତଦଶ ସାଙ୍ଗ୍ରି-ଲା ଶିଖର ବୈଠକରେ ଉଦ୍ବୋଧନ ଦେବେ। ଇଣ୍ଡୋନେସିଆ, ମାଲେସିଆ ଓ ସିଙ୍ଗାପୁର ହେଉଛନ୍ତି ତିନୋଟି ଆସିଆନ୍ ଦେଶ, ଯେଉଁମାନଙ୍କ ସହିତ ଭାରତର ଭଲ ଭାଗିଦାରୀ ସଂପର୍କ ରହିଛି।
