ଭୁବନେଶ୍ୱର: ମୋଦି ସରକାରଙ୍କୁ ସମାଲୋଚନା କରିଥିବା କଂଗ୍ରେସର ବରିଷ୍ଠ ନେତା କପିଲ ଶିବଲଙ୍କ ବିଭିନ୍ନ ମନ୍ତବ୍ୟ ଉପରେ ପ୍ରତିକ୍ରିୟା ରଖିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଶ୍ରୀ ପ୍ରଧାନ କହିଛନ୍ତି ଯେ କପିଲ କେବଳ କଳାକୁ ଧଳା କରିବାରେ ସିଦ୍ଧହସ୍ତ। ପୂର୍ବରୁ କେନ୍ଦ୍ର ସରକାର ବିନା ମୂଲ୍ୟରେ ଖଣି ଲିଜ ଦେଉଥିବା ବେଳେ ରାଜ୍ୟସରକାର ତାଙ୍କୁ ସମର୍ଥନ କରୁଥିଲେ। ମୋଦି ସରକାର ଖଣି ନିଲାମୀ ବ୍ୟବସ୍ଥା ଲାଗୁ କରିବା ପରେ ଓଡ଼ିଶାକୁ ୭୧ ହଜାର ୭୨୬ କୋଟି ଟଙ୍କା ଓ ଅନ୍ୟାନ୍ୟ ଖଣିଜ ସମ୍ପଦରୁ ୪୦ ହଜାର ୫୭ କୋଟି ଟଙ୍କା ମିଳିପାରିଛି। କପିଲ ସିବଲଙ୍କ ନେତୃତ୍ୱରେ ସୁପ୍ରିମକୋର୍ଟର ମୁଖ୍ୟ ବିଚାରପତି ଦୀପକ ମିଶ୍ରଙ୍କ ବିରୁଦ୍ଧରେ ମହାଭିଯୋଗ ପ୍ରସ୍ତାବ ଆଣି କଂଗ୍ରେସ ଦଳ ଓଡିଆ ସ୍ୱାଭିମାନକୁ ଅପମାନିତ କରିବାକୁ ଚେଷ୍ଟା କରିଛି। ଆସନ୍ତା ନିର୍ବାଚନରେ ବିଜେପିର ପରାଜୟ ନେଇ କପିଲଙ୍କ ଯୁକ୍ତି ଉପରେ ଶ୍ରୀ ପ୍ରଧାନ କହିଛନ୍ତି ଯେ କପିଲଙ୍କ ନେତା ରାହୁଲ ଗାନ୍ଧି ଆମେଥୀରୁ ଏଥର ହାରିବେ।
