ଖୁଣ୍ଟା/ବଡସାହି : ପୁଲିସ ଦ୍ୱାରା ଅଟକ ଏକ ବାଉଁଶ ବୋଝେଇ ଟ୍ରକକୁ ବେପାରୀ ମାନେ ଛଡାଇ ନେବାରେ ସକ୍ଷମ ହୋଇଛନ୍ତି। ଏହାର ଏକ ଭାଇରାଲ ଭିଡିଓ ବର୍ତ୍ତମାନ ଯେତିକି ଚର୍ଚ୍ଚାର ବିଷୟ ନ ହୋଇଛି ପୁଲିସର କାର୍ଯ୍ୟ ଦକ୍ଷତା ପ୍ରତି ସେତିକି ପ୍ରଶ୍ନ ବାଚୀ ସୃଷ୍ଟି କରିଛି। ଶନିବାର ଅପରାହ୍ଣରେ ଉଦଳା ବାରିପଦା ରାସ୍ତାରେ ବାଉଁଶ ବୋଝେଇ କରି ଯାଉଥିବା ଏକ ଟ୍ରକକୁ ସାନକେରକୋ ନିକଟରେ ବଡସାହି ପୁଲିସ ଅଟକାଇଥିଲା। ପରିବହନ ନିୟମ ଉଲଂଘନ କରିଥିବାରୁ ଟ୍ରକଟିକୁ ବଡସାହି ଥାନାକୁ ନିଆଯାଉଥିଲା। ତେବେ ଖୁଣ୍ଟା ଥାନା ଅଧିନ ଡୁକୁରା ନିକଟରେ ସେହି ଟ୍ରକର ବେପାରୀ ସହିତ ଅନ୍ୟ ସାଥୀ ବେପାରୀ ପହଞ୍ଚି ଟ୍ରକ ନେବାକୁ ଦେଇନଥିଲେ।
ଘଟଣା କ୍ରମେ ସେଠାରେ ଭିଡ ଜମିବା ସହ ଉତ୍ତେଜନା ପ୍ରକାଶ ପାଇଥିଲା। ଲୋକମାନେ ପୁଲିସକୁ ଘେରିବା ସହିତ ପୁଲିସ ଗାଡିର ଚାଳକକୁ ଲାଇସେନ୍ସ ମାଗିବା ଓ ଗାଡି କାଗଜ ପତ୍ର ମଧ୍ୟ ମାଗୁଥିବାର ଦୃଶ୍ୟ ଭାଇରାଲ ଭିଡିଓରେ ଦେଖିବାକୁ ମିଳିଛି। ପରିସ୍ଥିତି ଅଣାୟତ ହେବାରୁ ଖଣ୍ଟା ଥାନାଧିକାରୀ ନବକୃଷ୍ଣ ନାଏକ ସଦଳବଳେ ପହଞ୍ଚି ଉଭୟ ପକ୍ଷଙ୍କୁ ଡୁକୁରା ଫାଣ୍ଡିକୁ ନେଇଥିଲେ। ସେଠାରେ ଆପୋଷ ବୁଝାମଣା ପରେ ବଡସାହି ଥାନାଧିକାରୀ ବିଶ୍ୱଜିତ ରାଉତରାୟ ସଦଳବଳେ ବଡସାହି ଥାନାକୁ ଫେରିଥିବା ବେଳେ ବାଉଁଶ ବେପାରୀ ଟ୍ରକଟିକୁ ନେଇଯାଇଥିଲେ। ଏ ସମ୍ପର୍କରେ ଖୁଣ୍ଟା ଥାନାରେ କୌଣସି ମାମଲା ରୁଜୁ ହୋଇନଥିବା ପୁଲିସ ସୁତ୍ରରୁ ଜଣା ପଡିଛି।
