କଟକ: ଆକାଶବାଣୀ କଟକ କେନ୍ଦ୍ରର ଶ୍ରୋତା ଅନୁସନ୍ଧାନ ଅଧିକାରୀ ଅନଙ୍ଗ ମଞ୍ଜରୀ ପ୍ରଧାନ ଗୁରୁବାର ଅବସର ଗ୍ରହଣ କରିଛନ୍ତି। ଅନଙ୍ଗ ମଞ୍ଜରୀ ଆକାଶବାଣୀ କଟକର ଶ୍ରୋତା ଅନୁସନ୍ଧାନ ବିଭାଗରେ ଉପନିର୍ଦ୍ଦେଶକ ଭାବେ କାର୍ଯ୍ୟ କରୁଥିଲେ। ସେ ଆକାଶବାଣୀ କଟକ ସହିତ ଦୂରଦର୍ଶନରେ ମଧ୍ୟ ସଫଳତାର ସହ କାର୍ଯ୍ୟ କରିଛନ୍ତି। ୧୯୯୧ ମସିହାରେ କଟକସ୍ଥିତ ଦୂରଦର୍ଶନ କେନ୍ଦ୍ରରେ ଅନୁସନ୍ଧାନ ସହାୟକ ଭାବେ ସେ ତାଙ୍କର କାର୍ଯ୍ୟ ଆରମ୍ଭ କରିଥିଲେ। ପରେ ସେ ଅଗରତାଲା ଓ ଛତିଶଗଡ ଆକାଶବାଣୀରେ ଶ୍ରୋତା ଅନୁସନ୍ଧାନ ଅଧିକାରୀଭାବେ କାର୍ଯ୍ୟ ତୁଲାଇଥିଲେ।
ତାଙ୍କ ବିଦାୟକାଳୀନ ସମ୍ବର୍ଦ୍ଧନା ସଭା ଆକାଶବାଣୀ କଟକ କେନ୍ଦ୍ର ପରିସରରେ ଅନୁଷ୍ଠିତ ହୋଇଯାଇଛି। ଏଥିରେ ସମସ୍ତ କର୍ମଚାରୀ ଉପସ୍ଥିତ ରହି ତାଙ୍କ ଅବସରକାଳୀନ ଜୀବନ ଆନନ୍ଦମୟ ହେଉ ବୋଲି କାମନା କରିଥିଲେ। ସେହିଭଳି ଆକାଶବାଣୀ କଟକର ଅନ୍ୟତମ କର୍ମଚାରୀ କୃଶାସନ ପରିଡାଙ୍କୁ ମଧ୍ୟ ବିଦାୟକାଳୀନ ସମ୍ବର୍ଦ୍ଧନା ପ୍ରଦାନ କରାଯାଇଛି।
