ନୂଆଦିଲ୍ଲୀ : ଦିଲ୍ଲୀ ହାଇକୋର୍ଟ ଆଇଏନ୍ଏକ୍ସ ମିଡିଆ କଳାଧନ ମାମଲାରେ ପୂର୍ବତନ ଅର୍ଥମନ୍ତ୍ରୀ ତଥା କଂଗ୍ରେସ ନେତା ପି. ଚିଦମ୍ବରମ୍ଙ୍କ ମଧ୍ୟବର୍ତ୍ତୀକାଳୀନ ଜାମିନ୍ ଆବେଦନ ଖାରଜ କରିଦେଇଛନ୍ତି । ସଲିସିଟର ଜେନେରାଲ୍ ତୁଷାର ମେହେଟ୍ଟା ଏମସ୍ ମେଡିକାଲ୍ ବୋର୍ଡର ରିପୋର୍ଟ ପାଠ କରି ଶୁଣାଇବା ପରେ କୋର୍ଟ ତାଙ୍କର ଆବେଦନକୁ ଖାରଜ କରିଦେଇଛନ୍ତି । ଶ୍ରୀ ଚିଦମ୍ବରମ୍ଙ୍କର ସ୍ୱାସ୍ଥ୍ୟ ଠିକ୍ ରହିଛି ଓ ସେ ହସ୍ପିଟାଲରେ ରହିବାର କୌଣସି ଆବଶ୍ୟକତା ନାହିଁ ବୋଲି ଏମସ୍ ମେଡିକାଲ୍ ବୋର୍ଡ ରିପୋର୍ଟ ଦେଇଥିଲେ। ଶ୍ରୀ ଚିଦମ୍ବରମ୍ଙ୍କ ସ୍ୱାସ୍ଥ୍ୟାବସ୍ଥାର ପରୀକ୍ଷା ନିରୀକ୍ଷା କରିବାକୁ କୋର୍ଟ୍ଙ୍କ ନିର୍ଦ୍ଦେଶକ୍ରମେ ସେହି ବୋର୍ଡର ଗଠନ କରାଯାଇଥିଲା। ଶ୍ରୀ ଚିଦମ୍ବରମ୍ ବର୍ତ୍ତମାନ ତିହାର ଜେଲରେ ରହିଛନ୍ତି।
ତାଙ୍କର ମଧ୍ୟବର୍ତ୍ତୀକାଳୀନ ଜାମିନ୍ ଆବେଦନର ଶୁଣାଣି କରୁଥିବା ଜଷ୍ଟିସ୍ ସୁରେଶ କେତ୍ ଶ୍ରୀ ଚିଦମ୍ବରମ୍ଙ୍କୁ ଏକ ସୁସ୍ଥ ତଥା ପରିଷ୍କାର ପରିଚ୍ଛନ ବାତାବରଣ ଯୋଗାଇ ଦେବାକୁ ତିହାର ଜେଲ୍ ଅଧୀକ୍ଷକଙ୍କୁ ନିର୍ଦ୍ଦେଶ ଦେଇଛନ୍ତି। ତାଙ୍କର ନିୟମିତ ଭାବେ ଡାକ୍ତରୀ ପରୀକ୍ଷା କରାଯିବାକୁ ମଧ୍ୟ କୋର୍ଟ ନିର୍ଦ୍ଦେଶ ଦେଇଛନ୍ତି।
