ସୋନପୁର : ୧୪୪ ବର୍ଷ ପାତାଳି ହୋଇଥିବା ଜଗତର ନାଥ ଶ୍ରୀ ଜଗନ୍ନାଥଙ୍କ ଲୀଳାକ୍ଷେତ୍ର ସୁବର୍ଣ୍ଣପୁର ଜିଲାର କୋଟସମଲାଇର ଛଲିଆ ପାହାଡରେ ହେବାକୁ ଥିବା ଶ୍ରୀ ଜଗନ୍ନାଥଙ୍କ ଭବ୍ୟ ମନ୍ଦିର ନିର୍ମାଣ ପ୍ରସ୍ତାବ ଏକ ପ୍ରକାର ଅନିଶ୍ଚିତତା ମଧ୍ୟରେ ରହିଯାଇଛି। ପାତାଳୀ ଶ୍ରୀକ୍ଷେତ୍ରରେ ନିର୍ମିତ ହେବାକୁ ଥିବା ମନ୍ଦିରର ଗର୍ଭଗୃହ ଓ ମୁଖଶାଳା ନିର୍ମାଣ ପାଇଁ ୪ କୋଟି ଟଙ୍କାର ବ୍ୟୟ ଅଟକଳକୁ ପୁରୀ ଶ୍ରୀମନ୍ଦିର ପରିଚାଳନା କମିଟି ବୈଠକରେ ଅନୁମୋଦନ କରାଯାଇଥିଲା; କିନ୍ତୁ ଇତିମଧ୍ୟରେ ଦୀର୍ଘ ୩ ବର୍ଷରୁ ଉଦ୍ଧ୍ୱର୍ ସମୟ ବିତିଯାଇଥିଲେ ସୁଦ୍ଧା ଏ ଦିଗରେ ରାଜ୍ୟ ସଂସ୍କୃତି ବିଭାଗ କୌଣସି ତତ୍ପରତା ପ୍ରଦର୍ଶନ କରୁନଥିବାରୁ ବର୍ତ୍ତମାନ ଫାଇଲ ଭିତରେ ଶ୍ରୀମନ୍ଦିର ପରିଚାଳନା କମିଟିର ଅନୁମୋଦନ ପ୍ରସ୍ତାବ ରହି ଅଳନ୍ଧୁ ଖାଉଥିବା ଆଲୋଚନା ହେଉଛି।
ଶ୍ରୀମନ୍ଦିର ପରିଚାଳନା କମିଟି ବୈଠକରେ ହୋଇଥିବା ବିିବରଣୀର ବିଷୟ ୧୦ (ଝ) ଅନୁଯାୟୀ, ଶ୍ରୀମନ୍ଦିର ବୈଷୟିକ କମିଟି ପାତାଳି ଶ୍ରୀକ୍ଷେତ୍ରରେ ଶ୍ରୀ ଜଗନ୍ନାଥ ମହାପ୍ରଭୂଙ୍କ ମୁଖ୍ୟ ମନ୍ଦିର ଓ ଜଗମୋହନ ନିର୍ମାଣ ସକାଶେ ଉକ୍ତ ସ୍ଥାନ ପରିଦର୍ଶନ କରିଥିଲେ। ସ୍ଥପତି ଭବାନୀ ଶଙ୍କର ମିଶ୍ର ମନ୍ଦିର ନିର୍ମାଣ ପାଇଁ ଯୋଜନା ପ୍ରସ୍ତୁତ କରିଥିଲେ। ୪ କୋଟି ଟଙ୍କାରେ ଭବ୍ୟ ମନ୍ଦିର ନିର୍ମାଣ କରିବାକୁ ଯୋଜନା ହୋଇଥିଲା । ପରିଚାଳନା କମିଟି ଆଗରେ ପ୍ରସ୍ତାବ ଉପସ୍ଥାପନ ପରେ ପ୍ଲାନ ଓ ଖର୍ଚ୍ଚକୁ ଅନୁମୋଦନ କରି ପରବର୍ତ୍ତି ପଦକ୍ଷେପ ପାଇଁ ସୁବର୍ଣ୍ଣପୁର ଜିଲାପାଳଙ୍କ ନିକଟକୁ ପତ୍ର ପ୍ରେରଣ ନିମନ୍ତେ ନିଷ୍ପତ୍ତି ନିଆଯିବା ସହ ଏହି ଖର୍ଚ୍ଚ ରାଜ୍ୟ ସରକାର ବହନ କରିବା ପାଇଁ ବୈଠକରେ ଅନୁରୋଧ କରାଯାଇଥିଲା। ଏହା ବ୍ୟତୀତ ସ୍ଥପତି ତଥା ଜାତୀୟ ପୁୁରସ୍କାରପ୍ରାପ୍ତ ପ୍ରସ୍ତର ଶିଳ୍ପୀ ପଦ୍ମଶ୍ରୀ ପଦ୍ମଭୂଷଣ ରଘୁନାଥ ମହାପାତ୍ରଙ୍କ ଦ୍ୱାରା ପ୍ରସ୍ତୁତ କରାଯାଇଥିବା ଯୋଜନା ଅନୁସାରେ ପଥର ଖୋଦେଇ ରେଖା ପାଇଁ ୧ କୋଟି ୩୪ ଲକ୍ଷ ୩୧ ହଜାର ୨ ଶହ ଟଙ୍କାର ବ୍ୟୟ ଅଟକଳ କରାଯାଇଥିଲା । ଏଥିରେ ପୀଠ, ବାରଣ୍ଡି, ବାଡା, ପାଶ୍ୱର୍ ମନ୍ଦିର, ଉଡାସିଂହ, ନବଗ୍ରହ, ଦ୍ୱାରସିଂହ ଆଦି ନିର୍ମାଣ ବ୍ୟବସ୍ଥା ରହିଛି। ଜଗମୋହନ ପାଇଁ ୯୧ ଲକ୍ଷ ୨୮ ହଜାର ଟଙ୍କାର ଅଟକଳ ପ୍ରସ୍ତୁତ କରାଯାଇଥିଲା। ଯେଉଁଥିରେ ପୀଠ ସହ ବାରଣ୍ଡି, ବାଡା, ପିଢାଚାଳ, ବେଡି, ଦଧିନଉତି, କଳସ, ଦ୍ୱାରବନ୍ଧ, ଦ୍ୱାରପାଳ ସହ ଅନ୍ୟାନ୍ୟ ବ୍ୟବସ୍ଥା ରହିଥିଲା। ନାଟମଣ୍ଡପ ନିର୍ମାଣ ପାଇଁ ୭୧ ଲକ୍ଷ ୩୮ ହଜାର ୪ ଶହ ଟଙ୍କାର ବ୍ୟୟ ଅଟକଳ କରାଯାଇଥିଲା। ଏଥିରେ ମଧ୍ୟ ପୀଠ, ବାଡା, ବାରଣ୍ଡି, ପିଢାଚାଳ, ଦ୍ୱାରବନ୍ଧ, ଦ୍ୱାରପାଳ, ଦୋପିଚା ସିଂହ ରହିବାର ବ୍ୟବସ୍ଥା ରହିଥିଲା। ଲକ୍ଷ୍ମୀ ଓ ବିମଳା ମନ୍ଦିର ନିର୍ମାଣ ପାଇଁ ୨୭ ଲକ୍ଷ ୬୩ ହଜାର ଟଙ୍କାର ଅଟକଳ କରାଯାଇଥିଲା। ଏଥିରେ ବି ପୂର୍ବର ସମସ୍ତ ବ୍ୟବସ୍ଥା ସହ ଦଧିନଉତି ଓ ପାଶ୍ୱର୍ମୂର୍ତ୍ତି ରହିବାର ବ୍ୟବସ୍ଥା ରହିଥିଲା। ଏହା ବ୍ୟତୀତ ଇଟା, ସିମେଣ୍ଟଣ୍ଟକଂକ୍ରିଟ ସ୍ଲାବ, କଲମ, ବିମ୍, ଲୁହାରଡ ଓ ପ୍ଲାଷ୍ଟର ପାଇଁ ୧୫ ଲକ୍ଷ ୮୦ ସହ ଏହିପରି ମୋଟ ପ୍ରାୟ ୩ କୋଟି ୯୮ ଲକ୍ଷ ୩୪ ହଜାର ୬ ଶହ ଟଙ୍କାର ଯୋଜନା ପ୍ରସ୍ତୁତ ହୋଇସାରିଥିଲା।
ଗତ ୮.୫.୨୦୧୪ ଦିନ ପୁରୀ ଶ୍ରୀମନ୍ଦିର କାର୍ଯ୍ୟାଳୟର ସଭାକକ୍ଷରେ ଅନୁଷ୍ଠିତ ଶ୍ରୀମନ୍ଦିର ପରିଚାଳନା କମିଟି ବୈଠକରେ ଏହା ଉପସ୍ଥାପନ କରାଯାଇଥିବା ଶ୍ରୀମନ୍ଦିର ପରିଚାଳନା କମିଟି ପକ୍ଷରୁ ଜିଲା ସଂସ୍କୃତି ବିଭାଗକୁ ଆସିଥିବା ପତ୍ରରେ ସ୍ପଷ୍ଟ କରାଯାଇଥିଲା। ଏପରିକି ବୈଠକ ପରେ ପୁରୀ ଶ୍ରୀମନ୍ଦିର କାର୍ଯର୍୍ୟାଳୟ ପକ୍ଷରୁ ପତ୍ର ସଂଖ୍ୟା ୬୨୪୧/୨/୨୦୧୪/ ୨.୬.୨୦୧୪ ଅନୁସାରେ ପାତାଳି ଶ୍ରୀକ୍ଷେତ୍ରରେ ଶ୍ରୀଜଗନ୍ନାଥଙ୍କ ମନ୍ଦିର ନିର୍ମାଣ ପାଇଁ ସ୍ଥାନ ନିରୂପଣ ତଥା ଅନ୍ୟାନ୍ୟ ପଦକ୍ଷେପ ସମ୍ପର୍କରେ ମନ୍ଦିର ପ୍ରଶାସକ ସୁବର୍ଣ୍ଣପୁର ଜିଲାପାଳଙ୍କୁ ଜଣାଇ ଦିଆଯାଇଥିଲା। ଏହି ପତ୍ର ମିଳିବା ପରେ ପାତାଳି ଶ୍ରୀକ୍ଷେତ୍ରରେ ଆବଶ୍ୟକ ସ୍ଥାନ ନିରୂପଣ କରି ସୁବର୍ଣ୍ଣପୁର ଜିଲାପାଳଙ୍କ କାର୍ଯ୍ୟାଳୟର ପତ୍ର ସଂଖ୍ୟା ୭୪୫୨/ ୧୫.୯.୨୦୧୪ ରେ ରାଜ୍ୟ ପର୍ଯ୍ୟଟନ ଓ ସଂସ୍କୃତି ବିଭାଗ କମିଶନରଙ୍କୁ ପତ୍ର ଲେଖି ମନ୍ଦିର ନିର୍ମାଣ ପାଇଁ ଆବଶ୍ୟକ ଥିବା ୪ କୋଟି ଟଙ୍କାର ବ୍ୟୟ ଅଟକଳକୁ ମଞ୍ଜୁର କରିବା ସହ ମନ୍ଦିର ନିର୍ମାଣ କାର୍ଯ୍ୟକୁ ସ୍ୱୀକୃତି ଦେବାକୁ ଅନୁରୋଧ କରିଥିଲେ। କିନ୍ତୁ ଇତି ଦୀର୍ଘ ୩ ବର୍ଷରୁ ଉଦ୍ଧ୍ୱର୍ ସମୟ ବିତି ଯାଇଥିଲେ ମଧ୍ୟ କୌଣସି ଉତ୍ତର ଆସିନଥିବାରୁ ଜିଲାର ଜଗନ୍ନାଥପ୍ରେମୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଛି।
ଏ ସମ୍ପର୍କରେ ସୁବର୍ଣ୍ଣପୁର ଜିଲାପାଳ ଦାଶରଥି ଶତପଥିଙ୍କୁ ପଚାରିବାରୁ ଏନେଇ ଜିଲା ସଂସ୍କୃତି ବିଭାଗ ପକ୍ଷରୁ ବାରମ୍ବାର ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରାଯାଇଛି। ମନ୍ଦିର ନିର୍ମାଣ ପାଇଁ ଆବଶ୍ୟକ ଜମି ମଧ୍ୟ ସ୍ଥିର ହୋଇ ବିଭାଗୀୟ କର୍ତ୍ତୃପକ୍ଷଙ୍କୁ ଜଣାଇ ଦିଆଯାଇ ସାରିଛି; କିନ୍ତୁ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ଠାରୁ ଏ ସଂକ୍ରାନ୍ତୀୟ କୌଣସି ପତ୍ରାଳାପ ହୋଇ ନଥିବାରୁ ପାତାଳିରେ ଶ୍ରୀଜଗନ୍ନାଥଙ୍କ ଭବ୍ୟ ମନ୍ଦିର ନିର୍ମାଣ ପାଇଁ ଏ ପର୍ଯ୍ୟନ୍ତ ପଦକ୍ଷେପ ଗ୍ରହଣ କରାଯାଇ ନାହିଁ ବୋଲି କହିଛନ୍ତି ।
ଫାଇଲରେ ଅଳନ୍ଧୁ ଖାଉଛି ଶ୍ରୀମନ୍ଦିର ପରିଚାଳନା କମିଟିର ପ୍ରସ୍ତାବ
Popular Categories
Previous article
Next article