ଲକ୍ଷ୍ନୌ: ଅଯୋଧ୍ୟାର ରାମ ଜନ୍ମଭୂମି-ବାବ୍ରୀ ମସଜିଦ ବିବାଦ ମାମଲାରେ ଗତ ଶନିବାର ସୁପ୍ରିମକୋର୍ଟ ଗୁରୁତ୍ଵପୂର୍ଣ୍ଣ ରାୟ ଦେଇଥିଲେ। ବିବାଦୀୟ ସ୍ଥଳକୁ ହିନ୍ଦୁ ପକ୍ଷଙ୍କୁ ପ୍ରଦାନ କରିବା ଏବଂ ମୁସଲମାନଙ୍କୁ ମସଜିଦ ନିର୍ମାଣ କରିବା ଲାଗି ଅଯୋଧ୍ୟା ସହରର ଏକ ପ୍ରମୁଖ ସ୍ଥାନରେ ୫ ଏକର ଜାଗା ଯୋଗାଇ ଦେବାକୁ ସୁପ୍ରିମକୋର୍ଟ କେନ୍ଦ୍ର ଏବଂ ଉତ୍ତରପ୍ରଦେଶ ସରକାରଙ୍କୁ ନିର୍ଦେଶ ଜାରି କରିଥିଲେ। ତେବେ ସୁପ୍ରିମକୋର୍ଟଙ୍କ ଏହି ରାୟକୁ ନେଇ ସୋସିଆଲ ମିଡିଆରେ ଅନେକ ବ୍ୟକ୍ତି ଆପତ୍ତିଜନକ ମନ୍ତବ୍ୟ ପୋଷ୍ଟ କରିଛନ୍ତି। ଏ ନେଇ ଉତ୍ତର ପ୍ରଦେଶ ପୁଲିସ ୬୫ଟି ମାମଲା ରୁଜୁ କରିଥିବାବେଳେ ୯୯ ଜଣଙ୍କୁ ଗିରଫ କରିଛି। ମଙ୍ଗଳବାର ସୁଦ୍ଧା ରାଜ୍ୟ ପୁଲିସ ବିଭାଗ ପକ୍ଷରୁ ୧୩ ହଜାର ୧୬ଟି ସୋସିଆଲ ମିଡିଆ ପୋଷ୍ଟ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବା ସହିତ ସେଗୁଡ଼ିକୁ ହଟାଇ ଦିଆଯାଇଛି। ରାଜ୍ୟ ଡିଜିପିଙ୍କ କାର୍ଯ୍ୟାଳୟ ପକ୍ଷରୁ ଏ ନେଇ ସୂଚନା ଦିଆଯାଇଛି। ସୂଚନାଯୋଗ୍ୟ, ସୁପ୍ରିମକୋର୍ଟଙ୍କ ରାୟ ପ୍ରକାଶ ପାଇବା ପରେ ବିଜେପି ଏବଂ କଂଗ୍ରେସ ଏହାକୁ ସ୍ବାଗତ କରିଥିଲେ। କିନ୍ତୁ ଏଆଇଏମଆଇଏମ ସଭାପତି ଅସଉଦ୍ଦିନ ଓୱେସୀ ରାୟକୁ ‘ତଥ୍ୟ ଉପରେ ବିଶ୍ଵାସ’ର ବିଜୟ ବୋଲି ଦର୍ଶାଇଥିଲେ।
ଅଯୋଧ୍ୟା ରାୟ ଉପରେ ସୋସିଆଲ ମିଡିଆରେ ବିବାଦୀୟ ପୋଷ୍ଟ; ୯୯ ଗିରଫ, ୬୫ ମାମଲା ରୁଜୁ
Popular Categories
Previous article
Next article