ସମାଜ ଡିଜିଟାଲ ଡେସ୍କ: ରାସ୍ତାରେ ଅଟକି ରହିଥିବା ଏକ ବସକୁ ଗୋଟିଏ କାର ଧକ୍କା ଦେବା ଫଳରେ ୯ ଜଣଙ୍କ ମୃତ୍ୟୁ ଘଟିଛି। ଶୁକ୍ରବାର ସକାଳ ପ୍ରାୟ ୧୦ଟାରେ ନାସିକ ଜାତୀୟ ରାଜପଥର ନାରାୟଣଗାଓଁ ନିକଟରେ ଏହି ଦୁର୍ଘଟଣା ଘଟିଛି। ମୃତକମାନେ ନିକଟ ଜୁନାର ଗ୍ରାମର ବୋଲି ସୂଚନା ମିଳିଛି।
ଏସପି ପଙ୍କଜ ଦେଶମୁଖ କହିଛନ୍ତି, ମହାରାଷ୍ଟ୍ର ପରିବହନ ବିଭାଗର ଏକ ବସ ମହାବଳେଶ୍ଵରରୁ ନାସିକ ଯାଉଥିଲା। ନାରାୟଣଗାଓଁ ନିକଟରେ ବସଟି ଖରାପ ହୋଇଯିବାରୁ ରାସ୍ତାପାର୍ଶ୍ବରେ ଅଟକି ରହିଥିଲା। ଫଳରେ ଯାତ୍ରୀମାନେ ବାହାରକୁ ଆସି ବୁଲାବୁଲି କରୁଥିଲେ। ଏକ କାର ବସ୍ର ନିକଟତର ହେବା ସମୟରେ ପଛପଟୁ ଦ୍ରୁତଗତିରେ ଆସୁଥିବା ଏକ ଟେମ୍ପୋ କାରଟିକୁ ଧକ୍କା ଦେଇଥିଲା। ଫଳରେ କାରଟି ବସ ସହିତ ଧକ୍କା ହେବା ସହିତ ଟେମ୍ପୋ ଏବଂ ବସ ମଝିରେ ଫଶିଯାଇଥିଲା। କାରରେ ଥିବା ୯ ଜଣଙ୍କର ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ କାର ମାଲିକ ସମ୍ପୃକ୍ତ ଅଛନ୍ତି। ସେ କିଛି ଶ୍ରମିକଙ୍କୁ ନିଜ ଗାଡ଼ିରେ ପାଖ ଗାଁରେ ଛାଡ଼ିବାକୁ ଯାଉଥିବାବେଳେ ଦୁର୍ଘଟଣାର ଶିକାର ହୋଇଛନ୍ତି। ପୁଲିସ ଦୁର୍ଘଟଣାଗ୍ରସ୍ତ ଗାଡ଼ିକୁ ଜବତ କରି ତଦନ୍ତ ଚଳାଇଛି।
Comments are closed.