ନ୍ୟୁଜିଲାଣ୍ଡ: ନ୍ୟୁଜିଲାଣ୍ଡର କ୍ରାଏଷ୍ଟଚର୍ଚ୍ଚ ସହରରେ ଥିବା ୨ଟି ମସଜିଦରେ ଗତ ଶୁକ୍ରବାର ଘଟିଥିବା ଗୁଳିକାଣ୍ଡରେ ପ୍ରାଣ ହରାଇଥିବା ୪୯ଜଣଙ୍କ ମଧ୍ୟରେ ୬ ଭାରତୀୟ ରହିଛନ୍ତି। ନ୍ୟୁଜିଲାଣ୍ଡ ସରକାର ଏହା ସ୍ପଷ୍ଟ କରିଛନ୍ତି। ନ୍ୟୁଜିଲାଣ୍ଡରେ ଅବସ୍ଥାପିତ ଭାରତୀୟ ଉଚ୍ଚାୟୁକ୍ତ ଏ ସମ୍ପର୍କରେ ସୂଚନା ଦେଇଛନ୍ତି। ମୃତକଙ୍କ ମଧ୍ୟରେ ଗୁଜରାଟର ୪ଜଣ ଏବଂ ହାଇଦ୍ରାବାଦର ୨ ଜଣ ରହିଛନ୍ତି।
ମୋଟ ୭ ଭାରତୀୟ ଏହି ଆକ୍ରମଣ ଶିକାର ହୋଇଥିଲେ। ସେମାନଙ୍କ ମଧ୍ୟରେ ୪ଜଣ ଗୁଜରାଟର ଏବଂ ୩ଜଣ ହାଇଦ୍ରାବାଦର ଥିଲେ। ଏମାନଙ୍କ ମଧ୍ୟରୁ ୬ଜଣ ମୃତ୍ୟୁ ଘଟିଥିବାବେଳେ ଆଉ ଜଣେ ଆହତ ଚିକିତ୍ସାଧୀନ ଅଛନ୍ତି। ମୃତକଙ୍କ ମଧ୍ୟରେ ଗୁଜରାଟର ଆରିଫ ହୋରା ଏବଂ ତାଙ୍କ ପୁଅ ରମିଜ ହୋରା ରହିଛନ୍ତି। ରମିଜ ୭ବର୍ଷ ହେଲା କ୍ରାଏଷ୍ଟଚର୍ଚ୍ଚରେ ନିଜ ପତ୍ନୀଙ୍କ ସହ ରହୁଥିଲେ। ତାଙ୍କ ବାପା ନିକଟରେ ନ୍ୟୁଜିଲାଣ୍ଡ ବୁଲିବାକୁ ଯାଇଥିଲେ। ଉଭୟେ ଗତ ଶୁକ୍ରବାର ମସଜିଦକୁ ନମାଜ ପାଠ କରିବାକୁ ଯାଇଥିବାବେଳେ ଆକ୍ରମଣର ଶିକାର ହୋଇଥିଲେ। ସେହିପରି ଗୁଜରାଟ ନବସାରୀ ଅଞ୍ଚଳର ଜୁନୈଦ ୟୁସୁଫ କାରା ଏବଂ ଭରୁଚ ଅଞ୍ଚଳର ଲୁନାରା ଗାଁର ହାଫେସ ମୁସାଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି।
ତେବେ ସମସ୍ତ ମୃତକଙ୍କୁ ଅକଲାଣ୍ଡଠାରେ ଶ୍ରଦ୍ଧାଞ୍ଜଳି ଅର୍ପଣ କରାଯାଇଛି। ମୃତକ ଭାରତୀୟମାନଙ୍କ ପରିବାର ଲୋକେ ଭାରତ ଫେରୁଥିବା ସୂଚନା ମିଳିଛି।
