ସମାଜ ଡିଜିଟାଲ ଡେସ୍କ: ହାତ୍ରାସ୍ ଦଳାଚକଟା ମାମଲାରେ ଏପର୍ଯ୍ୟନ୍ତ ୬ ଜଣଙ୍କୁ ଗିରଫ କରାଯାଇଛି। ସେଥି ମଧ୍ୟରେ ଦୁଇ ଜଣ ମହିଳା ଅଛନ୍ତି। ଗିରଫ ହୋଇଥିବା ସମସ୍ତ ବ୍ୟକ୍ତି ଆୟୋଜକ କମିଟିର ସଦସ୍ୟ ଏବଂ ସେବକ। ଅଲିଗଡ ରେଞ୍ଜ ଆଇଜି ଶଲଭ ମଥୁର ସାମ୍ବାଦିକ ସମ୍ମିଳନୀ ଜରିଆରେ ଏହି ସୂଚନା ଦେଇଛନ୍ତି। ସେ କହିଛନ୍ତି ଯେ, ସମସ୍ତ ୧୨୧ ମୃତକଙ୍କ ପରିଚୟ ମିଳିଛି। ସମସ୍ତଙ୍କ ଶବ ବ୍ୟବଚ୍ଛେଦ ମଧ୍ୟ କରାଯାଇଛି। ଏହି ଘଟଣାର ତଦନ୍ତ ପାଇଁ ଅନେକ ଦଳ ଗଠନ କରାଯାଇଛି।
ସେ ଆହୁରି କହିଛନ୍ତି, ପଚରାଉଚରା ପାଇଁ ବର୍ତ୍ତମାନ ୧୨ ଜଣ ଲୋକ ପୁଲିସ ହେପାଜତରେ ଅଛନ୍ତି। ଫରେନସିକ୍ ଟିମ୍ ମଧ୍ୟ ଘଟଣାସ୍ଥଳରେ ଯାଞ୍ଚ କରିଛି। ଦଳାଚକଟାରେ ୧୧୨ ଜଣ ମହିଳାଙ୍କ ମୃତ୍ୟୁ ଘଟିଛି। ଏହି ମାମଲାରେ ଭୋଲେ ବାବାଙ୍କ ଭୂମିକା ସାମ୍ନାକୁ ଆସିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ମୁଖ୍ୟ ଅଭିଯୁକ୍ତ ଫେରାର ସେବାୟତ ପ୍ରକାଶ ମଧୁକରଙ୍କ ଉପରେ ୧ ଲକ୍ଷ ଟଙ୍କାର ପୁରସ୍କାର ଘୋଷଣା କରାଯାଇଛି।
- Advertisement -
