ଡେସ୍କ: ଚାଇନାର ଉତ୍ତର-ପଶ୍ଚିମ ଅଂଚଳର ଗଣସୁ ଏବଂ ଇଙ୍ଗାଇରେ ୬.୨ ସାନ୍ଦ୍ରତା ବିଶିଷ୍ଟ ଭୂକମ୍ପ ପରେ ୧୧୮ ଜଣଙ୍କର ମୃତ୍ୟୁ ଘଟିଥିବା ଜଣାପଡିଛି। ଏହି ଭୂକମ୍ପରେ ୫୦୦ରୁ ଅଧିକ ଆହତ ହୋଇଛନ୍ତି। ସେଠାକାର ଗଣମାଧ୍ୟମ ରିପୋର୍ଟ ଅନୁଯାୟୀ ଗତକାଲି ମଧ୍ୟରାତ୍ରିର କିଛି ସମୟ ପୂର୍ବରୁ ଭୂକମ୍ପ ଅନୁଭୂତ ହୋଇଥିଲା। ନିମ୍ନ ତାପମାତ୍ରା ସତ୍ୱେ ଲୋକମାନେ ଘରୁ ବାହାରକୁ ପଳାଇଥିଲେ। ଏହି ଭୂକମ୍ପରେ ହଜାର ହଜାର ଘର ଏବଂ ଭିତ୍ତିଭୂମି ନଷ୍ଟ ହୋଇଥିବା ଜଣାପଡିଛି। ଗଣସୁ କର୍ତ୍ତୃପକ୍ଷ କହିଛନ୍ତି ଯେ ଏହି ପ୍ରଦେଶରେ ୧୦୫ ଜଣ ପ୍ରାଣ ହରାଇଥିବା ବେଳେ ୩୯୭ ଜଣ ଆହତ ହୋଇଛନ୍ତି। ଇଙ୍ଗାଇରେ ୧୩ ଜଣଙ୍କର ମୃତ୍ୟୁ ହୋଇଥିବା ବେଳେ ୧୮୨ ଜଣ ଆହତ ହୋଇଛନ୍ତି ଓ ୨୦ ଜଣ ନିଖୋଜ ଅଛନ୍ତି। ୨୦୧୦ ମସିହାରେ ଏହି ଦୁଇଟି ସ୍ଥାନରେ ଭୂକମ୍ପ ଘଟି ୨ ହଜାର ୬୯୮ ଜଣଙ୍କର ମୃତ୍ୟୁ ଘଟିଥିଲା।
ଚୀନ୍ର ରାଷ୍ଟ୍ରପତି ସି ଜିନପିଙ୍ଗ ସନ୍ଧାନ ଓ ଉଦ୍ଧାର କାର୍ଯ୍ୟରେ ସମସ୍ତେ ଉଦ୍ୟମ କରିବାକୁ ଆହ୍ୱାନ ଦେଇଛନ୍ତି। ରାଜ୍ୟ ଗଣମାଧ୍ୟମ ସୂଚନା ଅନୁଯାୟୀ, ଉଦ୍ଧାର କାର୍ଯ୍ୟରେ ୩ ହଜାରରୁ ଅଧିକ ଅଗ୍ନିଶମ କର୍ମଚାରୀ ନିୟୋଜିତ ହୋଇଛନ୍ତି ଓ ଶହ ଶହ ସୈନିକଙ୍କୁ ଘଟଣାସ୍ଥଳକୁ ପଠାଯାଇଛି। ଅର୍ଥ ଏବଂ ଜରୁରୀକାଳୀନ ପରିଚାଳନା ମନ୍ତ୍ରଣାଳୟ ଜରୁରୀକାଳୀନ ରିଲିଫ ପାଣ୍ଠିରୁ ୨୨ ମିଲିୟନ ପାଉଣ୍ଡରୁ ଅଧିକ ଆବଣ୍ଟନ କରିଛନ୍ତି।
Comments are closed.