ଭୁବନେଶ୍ବର: ‘କରୋନା’କୁ ନେଇ ଅଯଥା ଆତଙ୍କିତ ହୁଅନ୍ତୁ ନାହିଁ ବରଂ ସଚେତନ ରୁହନ୍ତୁ। ରାଜ୍ୟରେ ଅତ୍ୟାବଶ୍ୟକ ସାମଗ୍ରୀର କୌଣସି ଅଭାବ ରହିବ ନାହିଁ। ସମସ୍ତ ରାସନ ସାମଗ୍ରୀ ବଜାରରେ ପର୍ଯ୍ୟାପ୍ତ ପରିମାଣରେ ମହଜୁଦ ଅଛି। ସ୍ଥିତିକୁ ଦୃଷ୍ଟିରେ ରଖି ପିଡିଏସ୍ ସାମଗ୍ରୀ ୩ ମାସ ପାଇଁ ଆଗୁଆ ଯୋଗାଇ ଦେବା ପାଇଁ ବିଚାର କରୁଛୁ ଏବଂ ଆସନ୍ତା ଦିନେ କିମ୍ବା ଦୁଇ ଦିନ ମଧ୍ୟରେ ଏ ସମ୍ପର୍କରେ ଆମେ ଜଣାଇ ଦେବୁ ବୋଲି କହିଛନ୍ତି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ। ମଙ୍ଗଳବାର ରାଜ୍ୟରେ ‘କରୋନା’ ସ୍ଥିତି ଓ ମୁକାବିଲା ନେଇ ନିଜ ପ୍ରତିକ୍ରିୟାରେ ମନ୍ତ୍ରୀ ଏହା କହିଛନ୍ତି।
ମନ୍ତ୍ରୀଙ୍କ କହିବାନୁସାରେ, ଆମ ବିଭାଗ ‘କରୋନା’କୁ ନେଇ ସମ୍ପୂର୍ଣ୍ଣ ସଚେତନ ଅଛି। ବଜାରରେ ଯେପରି କୌଣସି ଅତ୍ୟାବଶ୍ୟକ ସାମଗ୍ରୀର ଅଭାବ ନ ରହେ ତା’ ଉପରେ ଆମେ କଡ଼ା ନଜର ରଖିଛୁ ଓ ଅନ୍ୟ ବିଭାଗ ସହ ସମନ୍ୱୟ ରକ୍ଷା କରି କାର୍ୟ୍ୟ କରୁଛୁ। ସବୁ ଜିଲାପାଳଙ୍କୁ ଭିଡିଓ କନ୍ଫରେନ୍ସିଂ ଜରିଆରେ ସଜାଗ କରାଯାଇଛି।
ମନ୍ତ୍ରୀ ପୁନଶ୍ଚ କହିଛନ୍ତି, ବଜାରରେ ମାସ୍କ ଓ ସାନିଟାଇଜର୍ର ଅଭାବ ଦେଖାଦେଇଛି, କାରଣ ଲୋକମାନେ ଅଧିକ ମାତ୍ରାରେ ଏହାକୁ ଆବଶ୍ୟକ କରୁଛନ୍ତି। ସାନିଟାଇଜର ଓ ମାସ୍କର ଉତ୍ପାଦନ ଅଧିକ ମାତ୍ରାରେ ଚାଲିଛି ଓ ଖୁବ୍ କମ୍ ଦିନରେ ବଜାରରେ ପର୍ଯ୍ୟାପ୍ତ ପରିମାଣରେ ଏହା ଉପଲବ୍ଧ ହେବ।
ଗୁଜବରେ ଆଦୌ ବିଶ୍ୱାସ କରନ୍ତୁ ନାହିଁ। ଗୁଜବକାରୀଙ୍କ ବିଷୟରେ ଖବର ମିଳିଲେ ତାଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମନ୍ତ୍ରୀ ନିଜ ପ୍ରତିକ୍ରିୟାରେ କହିଛନ୍ତି।
