କେନ୍ଦୁଝରଗଡ଼ : କେନ୍ଦୁଝର ଜିଲା ଆଇନସେବା ପ୍ରାଧିକରଣର ପାରାଆଇନ ସ୍ୱେଛାସେବୀ ବନଲତା ଜେନା ଓ ରିଟେନର ତଥା ସରକାରୀ ଆଇନଜୀବୀ ପ୍ରଶାନ୍ତ କୁମାର ଜେନା ୩ ଅସହାୟ ଶିଶୁଙ୍କୁ ଆଇନ ସେବା ପ୍ରାଧିକରଣ ପକ୍ଷରୁ ଉଦ୍ଧାର କରି ଉପଯୁକ୍ତ ଥଇଥାନ କରିଛନ୍ତି । ମୀନା ମୁଣ୍ଡା(୭), ଭୀମ ମୁଣ୍ଡା(୫) ଓ ରୁପା ମୁଣ୍ଡା (୩) ଏହି ୩ ଅସହାୟ ଶିଶୁଙ୍କୁ ଉଦ୍ଧାର କରି ସେମାନଙ୍କ ଉପଯୁକ୍ତ ଯତ୍ନ ଓ ଶିକ୍ଷା ବ୍ୟବସ୍ଥା ନିମନ୍ତେ ଉଦ୍ୟମ ଆରମ୍ଭ ହୋଇଛି। ସଦର ଥାନା ଠାକୁରଡିହି ଗ୍ରାମର ମିଥୁନ ମୁଣ୍ଡାଙ୍କ ସ୍ତ୍ରୀ ଗହମୀ ମୁଣ୍ଡା ପୋଖରୀରେ ବୁଡି ମୃତ୍ୟୁବରଣ କରିଥିବାରୁ ତାଙ୍କର ଏହି ୩ ଶିଶୁ ମା’ଛେଉଣ୍ଡ ହୋଇ ଅସହାୟ ଅବସ୍ଥାରେ ଥିଲେ। ବାପା ମିଥୁନ ଜଣେ ନିଶାସକ୍ତ ବ୍ୟକ୍ତି ହୋଇଥିବାରୁ ଶିଶୁ ମାନଙ୍କର ଭରଣପୋଷଣ କରିବାକୁ ସମ୍ପୂର୍ଣ୍ଣ ଅସମର୍ଥ ଥିଲେ। ତେଣୁ ଏହି ୩ ଶିଶୁ ଅସହାୟ ଅବସ୍ଥାରେ ଘର ଘର ବୁଲି ଦିନ କାଟୁଥିଲେ। ଜିଲା ଆଇନ ସେବା ପ୍ରାଧିକରଣର ରିଟେନର ଆଇନଜୀବୀ ପ୍ରଶାନ୍ତ କୁମାର ଜେନା ଏକ ଦରଖାସ୍ତ ମାଧ୍ୟମରେ ଏହି ୩ ଅସହାୟ ଶିଶୁଙ୍କୁ କିଭଳି ଉପଯୁକ୍ତ ଥଇଥାନ କରାଯାଇ ପାରିବ ସେ ନେଇ ଜିଲା ଆଇନ ସେବା ପ୍ରାଧିକରଣକୁ ନିବେଦନ କରିଥିଲେ । ଜିଲା ଆଇନ ସେବା ପ୍ରାଧିକରଣ ସଚିବ ମାମୀ ବେହେରା ଏହି ୩ ଅସହାୟ ଶିଶୁଙ୍କ ବିଷୟରେ ଅବଗତ ହେବାପରେ ତୁରନ୍ତ ଶିଶୁ ସୁରକ୍ଷା ସମିତି ସହ ଯୋଗାଯୋଗ କରିଥିଲେ। ସଚିବଙ୍କ ଏହି ଉଦ୍ୟମ ଫଳରେ ୩ ଅସହାୟ ଶିଶୁଙ୍କୁ ଉଦ୍ଧାର କରି କେନ୍ଦୁଝର ସହରର ବଣିଆପାଟସ୍ଥିତ ଓପନ ସେଣ୍ଟରରେ ଥଇଥାନ କରାଯାଇଛି।
Comments are closed.