ଭୁବନେଶ୍ବର : ରାଜ୍ୟର ଗ୍ରାମାଞ୍ଚଳରେ ଆଉ ନୂଆ ମଦ ଦୋକାନ ଖୋଲିବନାହିଁ । ୨୦୨୩-୨୪ ଆର୍ଥିକ ବର୍ଷ ପାଇଁ ଅବକାରୀ ନୀତିରେ ଏହି ବ୍ୟବସ୍ଥା ରହିଛି। ସରକାରଙ୍କ ପକ୍ଷରୁ ୨୦୨୩-୨୪ ଆର୍ଥିକ ବର୍ଷ ପାଇଁ ଅବକାରୀ ନୀତି ଜାରି କରାଯାଇଛି। ନୂଆ ଅବକାରୀ ନୀତି ସରକାରଙ୍କ ଅନୁମୋଦନ ଲାଭ କରିଥିବା ଗୁରୁବାର ବିଭାଗ ପକ୍ଷରୁ ଅତିରିକ୍ତ ଶାସନ ସଚିବ ମିହିର ପ୍ରସାଦ ମହାନ୍ତି ଅବକାରୀ ଆୟୁକ୍ତଙ୍କୁ ଚିଠି ଲେଖି ଜଣାଇଛନ୍ତି। ଏପ୍ରିଲ ୧ ତାରିଖରୁ ୨୦୨୪ ମାର୍ଚ୍ଚ ୩୧ ପର୍ଯ୍ୟନ୍ତ ଏହା ବଳବତ୍ତର ରହିବ। ନୂଆ ନୀତି ଅନୁସାରେ, ୨୦୨୩-୨୪ ବର୍ଷରେ ଗ୍ରାମାଞ୍ଚଳରେ ନୂଆ ମଦ ଦୋକାନ ଖୋଲିବାକୁ ଅନୁମତି ମିଳିବନି। ଗ୍ରାମାଞ୍ଚଳରେ କୌଣସି ପ୍ରକାରର ଠିପି ଖୋଲା ଲାଇସେନ୍ସ ପ୍ରଦାନ ନିମନ୍ତେ ନୂଆ ଆବେଦନ ଗ୍ରହଣ କରାଯିବ ନାହିଁ। ସହରାଞ୍ଚଳରେ ତାରକା ହୋଟେଲ ଓ ଅନ୍ୟ ହୋଟେଲଗୁଡ଼ିକର କୋଠରୀ ସଂଖ୍ୟାକୁ ଦୃଷ୍ଟିରେ ରଖି ଅବକାରୀ ଆୟୁକ୍ତ ଠିପି ଖୋଲା ଲାଇସେନ୍ସ ପ୍ରଦାନ କରିପାରିବେ। ଭାରତରେ ପ୍ରସ୍ତୁତ ବିଦେଶୀ ମଦ(ଆଇଏମଏଫଏଲ) ଦର ବୃଦ୍ଧି ପାଇବ। ନୂଆ ନୀତିରେ ରାଜ୍ୟବାସୀଙ୍କ ସ୍ବାସ୍ଥ୍ୟକୁ ଧ୍ୟାନରେ ରଖି ପାନୀୟ ପ୍ରସ୍ତୁତି, ଆମଦାନୀ, ରପ୍ତାନୀ, ପରିବହନ ଓ ବିକ୍ରୟ କରାଯିବ। ଏହି ବ୍ୟବସାୟକୁ ସହଜ କରିବାକୁ ସ୍ବୟଂକ୍ରିୟ ବ୍ୟବସ୍ଥା ଉପରେ ଗୁରୁତ୍ବ ଦିଆଯାଇଛି। ଅବକାରୀ କ୍ଷେତ୍ରରେ ତଦାରଖ ପାଇଁ ପ୍ରଯୁକ୍ତି ବିଦ୍ୟାର ଉପଯୋଗ ସହ ଖିଲାପିଙ୍କ ବିରୋଧରେ ଚଢ଼ଉ ଜୋରଦାର କରାଯିିବ। ରାଜ୍ୟ ସରକାର ଲାଇସେନ୍ସ ଦେୟ, ଏମଜିକ୍ୟୁ(ସର୍ବନିମ୍ନ ନିଶ୍ଚିତ ପରିମାଣ), ମଦ ପ୍ରସ୍ତୁତ ପାଇଁ ଆବେଦନ ଫି’, ଯୋଗାଣକାରୀ ଓ ରିଟେଲର ଦେୟରେ ସାମାନ୍ୟ ବୃଦ୍ଧି କରିଛନ୍ତି। ଠିପି ଖୋଲା ମଦଦୋକାନକୁ ଠିପି ବନ୍ଦ ଭଳି କାଉଣ୍ଟର ବିକ୍ରି ଉପରେ କଟକଣା ଜାରି ହୋଇଛି। ଓଟିଡିସି ଏବଂ ଆଇଟିଡିସିକୁ ଅନ୍ ଲାଇସେନ୍ସ ପ୍ରଦାନ କରାଯାଇପାରିବ। ଓଡ଼ିଶାର ବେଳାଭୂମିରେ ମଦ ପରଷିବାକୁ ଅନୁମତି ମିଳିଛି।
Popular Categories
Previous article
Next article