୨ ଆନ୍ତଃରାଜ୍ୟ ଅପରାଧି ଗିରଫ, କାର ସମେତ ୫ ବାଇକ ଜବତ

କେନ୍ଦୁଝରଗଡ଼: କେନ୍ଦୁଝର ଜିଲାର ବିଭିନ୍ନ ଥାନା ଅଞ୍ଚଳରେ ଡକାୟତି ଓ ରାହାଜାନି ସହ କାର ଓ ବାଇକ୍‌‌ ଚୋରି କରି ଆସୁଥିବା ୨ ଆନ୍ତଃରାଜ୍ୟ ଅପରାଧିଙ୍କୁ ଟାଉନ ଥାନା ପୁଲିସ ସୋମବାର ଗିରଫ କରି କୋର୍ଟ ଚାଲାଣ କରିଛି। ଗିରଫ ଦୁଇ ଅଭିଯୁକ୍ତ ଝାଡ଼ଖଣ୍ଡର ଗିରିଡିହି ଜିଲା ଆହିଲ୍ୟପୁର ଥାନା ଲଖନପୁର ଗ୍ରାମର ମହମ୍ମଦ ସଲାହୁଦ୍ଦିନ(୩୧) ଓ ବଭଣ୍ଡିହା ଗ୍ରାମର ମହମ୍ମଦ ତାଜୁଦ୍ଦିନ(୨୧) ବୋଲି ଜଣାପଡ଼ିଛି। କେନ୍ଦୁଝର ସଦର ଥାନା ପଦ୍ମପୁର ଅଞ୍ଚଳରେ ରହି ବିଭିନ୍ନ ସମୟରେ ରାହାଜାନୀ ଓ ଡକାୟତ ଭଳି ସଙ୍ଗୀନ ଅପରାଧରେ ଜଡିତ ରହି କାର ଓ ବାଇକ୍‌‌ ଚୋରି କରି ନମ୍ବରପ୍ଲେଟ୍‌‌ ପରିବର୍ତ୍ତନ ସହ ଇଞ୍ଜିନ ଓ ଚେଚିସ୍‌‌ ନମ୍ବରବଦଳାଇ ବିକ୍ରି କରୁଥିବା ନେଇ କେନ୍ଦୁଝର ଟାଉନ ଥାନା ଓ ପଣ୍ଡାପଡ଼ା ଥାନା ସମେତ ପଶ୍ଚିମବଙ୍ଗର କୁଲଟି ଥାନାରେ ଏମାନଙ୍କ ମାମଲା ରହି ଆସିଛି। ବିଶେଷ ସୂତ୍ରରୁ ଖବରପାଇ ଟାଉନଥାନା ପୁଲିସ ଏହି ୨ ଅଭିଯୁକ୍ତଙ୍କୁ ସୋମବାର ଚମ୍ପୁଆ ନିକଟରୁ ଗିରଫ କରିବାସହ ସେମାନଙ୍କ ନିକଟରୁ ଏକ କାର୍ ସମେତ ୫ଟି ବାଇକ ଜବତ କରିଥିବା ସଦର ଥାନା ଅଧିକାରୀ ଶ୍ରୀକାନ୍ତ ସାହୁ କହିଛନ୍ତି। ଗିରଫ ପରେ ଏହି ୨ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।