ଗୋଟିଏ ଘଣ୍ଟାରେ ଲାଗିଲା ଏକଲକ୍ଷ ଚାରା : ସୁବର୍ଣ୍ଣପୁର ଜିଲ୍ଲା ପ୍ରଶାସନର ରେକର୍ଡ

ସୁବର୍ଣ୍ଣପୁର : ଗୋଟିଏ ଘଣ୍ଟାରେ ଏକ ଲକ୍ଷ ଚାରା ରୋପଣ କରି ସୁବର୍ଣ୍ଣପୁର ଜିଲ୍ଲା ପ୍ରଶାସନ ରବିବାର ଏକ ରେକର୍ଡ ସୃଷ୍ଟି କରିପାରିଛି । ବିଚାର ବିଭାଗ, ଜଙ୍ଗଲ ବିଭାଗ ଓ ସାମାଜିକ ଏବଂ ସ୍ୱେଚ୍ଛାସେବୀ ଅନୁଷ୍ଠାନ ଗୁଡ଼ିକର ସହଯୋଗରେ ସମୂହ ଚାରା ରୋପଣ କରାଯାଇଛି। ଏହି କାର୍ଯ୍ୟକ୍ରମରେ ଓଡ଼ିଶା ହାଇକୋର୍ଟର ବିଚାରପତି ଜଷ୍ଟିସ୍‍ ଚିତ୍ତରଞ୍ଜନ ଦାଶ ଓ ଜିଲ୍ଲାପାଳ ମନୀଷା ବାନାର୍ଜୀ ଯୋଗଦେଇ ଚାରାରୋପଣ କରିଥିଲେ।

ଜିଲ୍ଲାର ସମସ୍ତ ଗ୍ରାମ ପଞ୍ଚାୟତରେ ପୂର୍ବ ଚିହ୍ନିତ ପଡ଼ିଆରେ ଏକଲକ୍ଷ ଚାରା ରୋପଣ ହୋଇଥିବାରୁ ସବୁଜ ସଂକଳ୍ପ ସଫଳ ହୋଇଛି ବୋଲି ବିଚାରପତି କହିଛନ୍ତି । ଏଥିସହ ଆହୁରି ଅଧିକ ସବୁଜବଳୟ ସୃଷ୍ଟି ପାଇଁ ସେ ଜନସାଧାରଣଙ୍କୁ ଆହ୍ୱାନ କରିଛନ୍ତି । ଦିନକୁ ଦିନ ବଢ଼ୁଥିବା ତାପମାତ୍ରା, ଭୂତଳ ଜଳସ୍ତର ହ୍ରାସ ଓ ସ୍ୱଳ୍ପ ବୃଷ୍ଟିପାତକୁ ଆଖିଆଗରେ ରଖି ଏହି ସବୁ ଅଭିଯାନ ଆରମ୍ଭ ହୋଇଛି ବୋଲି ଜିଲ୍ଲାପାଳ କହିଛନ୍ତି।