ସମ୍ବଲପୁର: ବୁର୍ଲା ଭିମସାର ମେଡ଼ିକାଲ ବିବାଦ ତେଜିବାରେ ଲାଗିଛି । ଶନିବାର କନିଷ୍ଠ ଡାକ୍ତରମାନେ ଓପିଡି ଓ ଆଇପିଡି ସେବା ବନ୍ଦ କରି ଆନ୍ଦୋଳନକୁ ଓହ୍ଲାଇଛନ୍ତି । ହେଲେ ଜରୁରୀକାଳୀନ ସେବା ଜାରି ରହିଛି । ଭିମସାର ନିର୍ଦ୍ଦେଶକ ଅଶ୍ୱିନୀ ପୂଜାହାରୀଙ୍କୁ ହଟାଇବା ପାଇଁ ଦିଆଯାଇଥିବା ୪୮ ଘଣ୍ଟା ସମୟ ମହଲତ ଆଜି ଶେଷ ହୋଇଛି । ଶନିବାର ଏନେଇ କୌଣସି ପଦକ୍ଷେପ ନିଆ ଯାଇନଥିବା ବେଳେ କନିଷ୍ଠ ଡାକ୍ତର ସଂଘ ସହ କେହି ଆଲୋଚନା ମଧ୍ୟ କରିନାହାନ୍ତି । ଯଦି ଆସନ୍ତା ସୋମବାର ମଧ୍ୟରେ ଯଦି କୌଣସି ପଦକ୍ଷେପ ଗ୍ରହଣ କରାନଯାଏ ତେବେ ରୋଗୀ ସେବା ବନ୍ଦ କରାଯିବ ବୋଲି କନିଷ୍ଠ ଡାକ୍ତର ସଂଘ ପକ୍ଷରୁ ଚେତାବନୀ ଦିଆଯାଇଛି ।
ସୂଚନାଯୋଗ୍ୟ, ନିଜ ପଦବୀର ଦୁର୍ବ୍ୟବହାର କରୁଥିବା ନେଇ ଭିମସାର ନିର୍ଦ୍ଦେଶକ ପ୍ର. ଅଶ୍ୱିନୀ ପୂଜାହାରୀଙ୍କ ନାମରେ ଅଭିଯୋଗ ହୋଇଥିଲା । ଏହା ସହ ଛାତ୍ରଛାତ୍ରୀଙ୍କୁ ଫେଲ କରି ଦେବାକୁ ମଧ୍ୟ ଧମକ ଦିଆଯାଇଥିଲା। ଏଭଳି ୧୦ଟି ଅଭିଯୋଗ ସମ୍ବଳିତ ଦାବିପତ୍ର କନିଷ୍ଠ ଡାକ୍ତର ସଂଘ ସ୍ୱାସ୍ଥ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ପ୍ରଦାନ କରିଥିଲେ । ନିର୍ଦ୍ଦେଶକ ପ୍ର. ଅଶ୍ୱିନୀ ପୂଜାହାରୀଙ୍କ ବଦଳି ପାଇଁ କନିଷ୍ଠ ଡାକ୍ତର ସଂଘ ସ୍ୱାସ୍ଥ୍ୟମନ୍ତ୍ରୀଙ୍କୁ ୪୮ ଘଣ୍ଟାର ସମୟ ମହଲତ ଦେଇଥିଲେ ।