ଗୁଆହାଟୀ: ଆସାମ ଗୋଲଘାଟ ଜିଲାରେ ବିଷାକ୍ତ ମଦ ପାନ କରି ଶନିବାର ସୁଦ୍ଧା ୯୩ ଜଣଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ କେତେଜଣ ମହିଳା ଅଛନ୍ତି। ଶନିବାର ସକାଳ ସୁଦ୍ଧା ୫୯ ଜଣଙ୍କ ମୃତ୍ୟୁ ଘଟିଥିଲା। କିନ୍ତୁ କ୍ରମାଗତ ଭାବେ ମୃତକଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଏବେ ବି ଜୋରହାଟ ଏବଂ ଗୋଲଘାଟ ଜିଲା ଡାକ୍ତରଖାନାରେ ୧୦୦ରୁ ଊର୍ଦ୍ଧ୍ବ ଲୋକ ଗୁରୁତର ଅବସ୍ଥାରେ ଚିକିତ୍ସାଧୀନ ଅଛନ୍ତି। ତେଣୁ ଆଗକୁ ମୃତକଙ୍କ ସଂଖ୍ୟାରେ ବୃଦ୍ଧି ଘଟିବ ବୋଲି ଆଶଙ୍କା କରାଯାଉଛି।
ସୂଚନା ଅନୁସାରେ ଏକ ଚାହା ବଗିଚାରେ ୨୫୦ରୁ ଊର୍ଦ୍ଧ୍ବ ଲୋକ ମଦ ପିଇଥିଲେ। ଏହି ମଦ ଗୋଟିଏ ଦୋକାନରୁ କିଣା ଯାଇଥିଲା। ସମସ୍ତେ ସାଲିମାର ଚାହା ବଗିଚାରେ କାମ କରୁଥିଲେ। ପୁଲିସ୍ ଏହି ଘଟଣାରେ ୨ ଜଣଙ୍କୁ ଗିରଫ କରିଛି। ଆସାମ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୋୱାଲ ଘଟଣାର ତଦନ୍ତ ନିର୍ଦେଶ ଦେଇଛନ୍ତି। ଏହି ଘଟଣାରେ ଜିଲାର ୨ ଜଣ ଅବକାରୀ ଅଧିକାରୀଙ୍କୁ ନିଲମ୍ବନ କରାଯାଇଛି। ଗୋଲଘାଟ ଜିଲା ହସ୍ପିଟାଲର ଜଣେ ଡାକ୍ତର କହିଛନ୍ତି ଯେ ବିଷାକ୍ତ ଦେଶୀ ମଦ ପାନ କରି ସମସ୍ତଙ୍କ ମୃତ୍ୟୁ ଘଟିଛି। ହସ୍ପିଟାଲକୁ ଆସିଥିବା ଅଧିକାଂଶ ଲୋକଙ୍କ ଅବସ୍ଥା ସଂକଟାପନ୍ନ ଥିଲା। ଆସାମ ମୁଖ୍ୟମନ୍ତ୍ରୀ ଏନେଇ ମଣ୍ଡଳ ଆୟୁକ୍ତ ଜୁଲି ସୋନୋୱାଲଙ୍କୁ ଘଟଣାର ତଦନ୍ତ ନେର୍ଦେଶ ଦେଇଛନ୍ତି। ଏକ ମାସ ମଧ୍ୟରେ ତଦନ୍ତ ରିପୋର୍ଟ ଦାଖଲ କରିବାକୁ କୁହାଯାଇଛି। ସୋନେୱାଲଙ୍କ ସମେତ ରାଜ୍ୟର ଶକ୍ତି ମନ୍ତ୍ରୀ ତପନ କୁମାର ଗୋଗୋଇ, ସାଂସଦ କାମାକ୍ଷା ପ୍ରସାଦ ତାସା ଏବଂ ବିଧାୟକ ମୃଣାଳ ସୌକିୟା ଘଟଣାସ୍ଥଳ ପରିଦର୍ଶନ କରିଛନ୍ତି।
