ଭୁବନେଶ୍ବର: ଦକ୍ଷିଣ ପୂର୍ବ ବଙ୍ଗୋପସାଗରରେ ସୃଷ୍ଟ ଅବପାତ ଅଧିକ ଘନୀଭୂତ ହେଉଛି। ଏହାର ପ୍ରଭାବରେ ଆସନ୍ତା ୧୬ ତାରିଖରୁ ତିନି ଦିନ ପର୍ଯ୍ୟନ୍ତ ରାଜ୍ୟର କିଛି ସ୍ଥାନରେ ବର୍ଷା ହେବାର ସମ୍ଭାବନା ରହିଛି। ଏହାକୁ ଦୃଷ୍ଟିରେ ରଖି ସରକାର ଜିଲାପାଳ ଓ ଚାଷୀଙ୍କୁ ସତର୍କ କରିଛନ୍ତି। ହସ୍ତଗତ ସୂଚନା ଅନୁସାରେ ଅବପାତ ବର୍ତ୍ତମାନ ଦକ୍ଷିଣ ଓ ଦକ୍ଷିଣ ପୂର୍ବ ଦିଗରେ ଚେନ୍ନାଇ ଠାରୁ ୧୦୫୦ କିମି ଓ ମଚ୍ଛଲିପଟ୍ଟନମ୍ ଠାରୁ ୧୨୫୦ କିମି ଦୂରରେ ରହିଛି। ପରବର୍ତ୍ତୀ ୨୪ ଘଣ୍ଟାରେ ଏହା ଭୀଷଣ ଅବପାତର ରୂପ ନେବା ସହିତ ବାତ୍ୟାର ରୂପ ନେଇପାରେ। ପରବର୍ତ୍ତୀ ୭୨ଘଣ୍ଟାରେ ଏହା ଅଧିକ ଘନୀଭୂତ ହୋଇ ଉତ୍ତର ପଶ୍ଚିମ ଦିଗରେ ଦକ୍ଷିଣ ଆନ୍ଧ୍ରପ୍ରଦେଶ ଏବଂ ଉତ୍ତର ତାମିଲନାଡ଼ୁ ଅଭିମୁଖେ ଗତି କରିବାର ସମ୍ଭାବନା ରହିଛି।
ଏହାର ପ୍ରଭାବରେ ୧୬ ତାରିଖରୁ ଓଡ଼ିଶାରେ ପାଗ ମେଘୁଆ ରହିବ। ଏଥିସହ ୧୮ ତାରିଖ ପର୍ଯ୍ୟନ୍ତ ଦକ୍ଷିଣ ଓ ଆଭ୍ୟନ୍ତରୀଣ ଓଡ଼ିଶାରେ ବର୍ଷାର ସମ୍ଭାବନା ରହିଛି। ତେବେ ଓଡ଼ିଶା ଉପରେ ଏହାର ବିଶେଷ ପ୍ରଭାବ ନଥିଲେ ସୁଦ୍ଧା ସତର୍କ ରହିବା ପାଇଁ ଉପକୂଳବର୍ତ୍ତୀ ଜିଲାର ଜିଲାପାଳଙ୍କୁ ସ୍ବତନ୍ତ୍ର ରିଲିଫ୍ କମିଶନର (ଏସ୍ଆରସି)ଙ୍କ ପକ୍ଷରୁ ସତର୍କ କରାଯାଇଛି। ଚାଷୀମାନେ ଯେପରି ସେମାନଙ୍କ ଧାନ ଓ ଅନ୍ୟାନ୍ୟ ଫସଲ ସୁରକ୍ଷିତ ରଖିବେ ସେଥିନିମନ୍ତେ ପରାମର୍ଶ ଦେବାକୁ କୁହାଯାଇଛି। ବର୍ଷା ସମୟରେ ମଣ୍ଡିରେ ଥିବା ଧାନ ନଷ୍ଟ ହେବାର ଆଶଙ୍କା ଥିବାରୁ ଏଥିପ୍ରତି ସତର୍କ ରହିବା ସହିତ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ କୁହାଯାଇଛି।
ଓୟୁଏଟି ପକ୍ଷରୁ ସତର୍କତାମୂଳକ ପଦକ୍ଷେପ ସ୍ବରୂପ ପାଚି ଯାଇଥିବା ଫସଲ ବିଲରୁ କାଟି ଆଣିବା ପାଇଁ କୃଷକମାନଙ୍କୁ ପରାମର୍ଶ ଦିଆଯାଇଛି। ସମ୍ଭାବ୍ୟ ବର୍ଷାକୁ ଦୃଷ୍ଟିରେ ରଖି କଟାଧାନକୁ ସୁରକ୍ଷିତ ସ୍ଥାନରେ ରଖିବା, ମଣ୍ଡିରେ ଥିବା ଧାନକୁ ଘୋଡ଼ାଇ ରଖିବା ବୁଣାଯାଇଥିବା ମୁଗ, ବିରି, ବୁଟ ଓ ମଟର ଜାତୀୟ ଫସଲରୁ ପାଣି ନିଷ୍କାସନ ପାଇଁ ବ୍ୟବସ୍ଥା କରିବାକୁ ଓୟୁଏଟି ସମ୍ପ୍ରସାରଣ ଶିକ୍ଷା ନିର୍ଦେଶାଳୟ ପକ୍ଷରୁ ସୂଚନା ଦିଆଯାଇଛି।
ଆନ୍ଧ୍ର ମୁହାଁଉଛି ବାତ୍ୟା: ଓଡ଼ିଶାରେ ୧୬ରୁ ବର୍ଷା ସମ୍ଭାବନା
Popular Categories
Previous article
Next article