ପୁଣେ: ପୁଣେ ମହାରାଷ୍ଟ୍ର କ୍ରିକେଟ ଆସୋସିଏସନ ଷ୍ଟାଡ଼ିୟମରେ ଚାଲିଥିବା ଆଇସିସି ବିଶ୍ବକପରେ ବାଂଲାଦେଶକୁ ୮ ୱିକେଟରେ ଅଷ୍ଟ୍ରେଲିଆ ପରାସ୍ତ କରିଛି। ମିଚେଲ ମାର୍ଶଙ୍କ ଶତକ ବଳରେ ଅଷ୍ଟ୍ରେଲିଆ ବିଜୟଲାଭ କରିଛି। ଏହାସହିତ ସେମି ଫାଇନାଲକୁ ଉନ୍ନୀତ ହୋଇଥିବା ଅଷ୍ଟ୍ରେଲିଆ ୯ରୁ ୭ଟି ମ୍ୟାଚ ଜିତିଛି। ବାଂଲାଦେଶ ସ୍କୋର ନିର୍ଦ୍ଧାରିତ ୫୦ ଓଭରରେ ୩୦୬/୮ ହୋଇଥିବାବେଳେ ଅଷ୍ଟ୍ରେଲିଆ ସ୍କୋର ୪୪.୪ ଓଭରରେ ୩୦୭/୨ ସ୍କୋର ସହ ବିଜୟ ଲାଭ କରିଛି। ଅପରପକ୍ଷରେ ଅଷ୍ଟ୍ରେଲିଆର ତାରକା ଖେଳାଳୀ ମିଚେଲ ମାର୍ଶ ଅପରାଜିତ ୧୭୭ ରନ ସ୍କୋର କରି ପ୍ଲେୟାର ଅଫ ଦି ମ୍ୟାଚ ହୋଇଛନ୍ତି।
ଆଜି ଅଷ୍ଟ୍ରେଲିଆ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ବାଂଲାଦେଶ ସ୍କୋର ୭୬ ଥିବାବେଳେ ପ୍ରଥମ ୱିକେଟ ପଡ଼ିଥିଲା। ଏହାପରେ ନିୟମିତ ବ୍ୟବଧାନରେ ୱିକେଟ ପତନ ହୋଇଥିଲେ ମଧ୍ୟ ବାଂଲାଦେଶ ନିର୍ଦ୍ଧାରିତ ୫୦ ଓଭରରେ ୮ ୱିକେଟ ବିନିମୟରେ ୩୦୬ ରନ ସ୍କୋର କରିଥିଲା।
୩୦୭ ରନ ବିଜୟ ଲକ୍ଷ୍ୟ ପିଛା କରି ଅଷ୍ଟ୍ରେଲିଆ ପାଳି ଆରମ୍ଭ କରିଥିଲା। ଅଷ୍ଟ୍ରେଲିଆର ସ୍କୋର ମାତ୍ର ୧୨ ରନ ଥିବାବେଳେ ପ୍ରଥମ ୱିକେଟ ପତନ ହୋଇଥିଲା। ଓପନର ଟାଭିସ ହେଡ ୧୦ ରନ କରି ଆଉଟ ହୋଇଥିଲେ। ଏହାପରେ ମିଚେଲ ମାର୍ଶ ଧୁଆଁଧାର ବ୍ୟାଟିଂ ସହ ୧୭୭ ରନ ସ୍କୋର କରିଥିଲେ। ଡାଭିଡ ୱାର୍ଣ୍ଣ ୫୩ ଓ ଷ୍ଟିଭ ସ୍ମିଥ ୬୩ ରନ ସ୍କୋର କରିଥିଲେ। କଲକାତା ଇଡେନ ଗାର୍ଡେନରେ ଅଷ୍ଟ୍ରେଲିଆ ଟିମ ଦକ୍ଷିଣ ଆଫ୍ରିକା ଭେଟିବ ଏବଂ ଏଥିରେ ବିଜୟୀ ହେବାକୁ ଆଜିର ମ୍ୟାଚ ଅଷ୍ଟ୍ରେଲିଆ ଖେଳାଳୀଙ୍କ ମନୋବଳ ବୃଦ୍ଧି କରିଛି ବୋଲି କୋଚ ପ୍ରକାଶ କରିଛନ୍ତି।
