ଆଠଗଡ଼: ଭୁବନେଶ୍ବରସ୍ଥିତ ଆଞ୍ଚଳିକ ଭେଷଜ ଗବେଷଣା କେନ୍ଦ୍ର ଆନୁକୁଲ୍ୟରେ ଆଠଗଡ଼ ବିଜୁ ପଟ୍ଟନାୟକ କଲ୍ୟାଣ ମଣ୍ଡପଠାରେ ବୁଧବାର ଫାଇଲେରିଆ ବା ବାତଜ୍ଵର ନିରାକରଣ ସମ୍ପର୍କିତ ଏକ କର୍ମଶାଳା ଅନୁଷ୍ଠିତ ହୋଇଯାଇଛି। ବିଶେଷ କରି ଆଠଗଡକୁ ଫାଇଲେରିଆ ମୁକ୍ତ କରିବା ନିମନ୍ତେ ସ୍ୱାସ୍ଥ୍ୟଶିକ୍ଷା, ସଚେତନତା ଓ ଜନଜାଗରଣ ଅଭିଯାନ ଲକ୍ଷ ନେଇ ଏହି ସ୍ଵତନ୍ତ୍ର କର୍ମଶାଳା ଆୟୋଜିତ ହୋଇଯାଇଛି। ବରିଷ୍ଠ ବହୁମୁଖୀ ସ୍ୱାସ୍ଥ୍ୟ ପରିଦର୍ଶକ ମହମ୍ମଦ୍ ଅସଲମଙ୍କ ସଂଯୋଜନାରେ ଅନୁଷ୍ଠିତ ଏହି କର୍ମଶାଳାରେ ଏନଏସି ଅଧ୍ୟକ୍ଷା ସସ୍ମିତା ରାଉତ, ଉପାଧ୍ୟକ୍ଷ ବି.ଶୁଭ୍ରଶଙ୍କର ଜ୍ୟୋତି, କାର୍ଯ୍ୟନିର୍ବାହୀ ଅଧିକାରୀ ବଳୟ ଦେହୁରୀ, ସମସ୍ତ ୱାର୍ଡ଼ର କାଉନସିଲର, ସ୍ଵଚ୍ଛସାଥୀ, ସ୍ଵସ୍ଥସାଥୀ ପରିଦର୍ଶିକା, ସ୍ୱଚ୍ଛକର୍ମୀ, ବିଓଭି ଚାଳକମାନେ ଯୋଗଦାନ କରିଥିଲେ।
ଆଠଗଡ଼ରେ ଫାଇଲେରିଆ ଆକ୍ରାନ୍ତ ଅଧିକ ରହିଥିବାରୁ କିପରି ଆଠଗଡ଼ରୁ ଏହି ରୋଗର ପ୍ରାଦୁର୍ଭାବକୁ ଦୂର କରାଯାଇପାରିବ ବିଭିନ୍ନ ସ୍ଥାନରେ ସଚେତନତା ସହ ମଶାର ବଂଶକୁ କିପରି ନିୟନ୍ତ୍ରଣ କରାଯିବ ଇତ୍ଯାଦି ବିଭିନ୍ନ ସ୍ତରରେ କାର୍ଯ୍ୟ ଜାରି ରଖାଯାଇଛି। ଏଥିନିମନ୍ତେ ଆଞ୍ଚଳିକ ଭେଷଜ ଗବେଷଣା କେନ୍ଦ୍ର ଏକ ୬ ମାସିକ ପ୍ରକଳ୍ପ ହାତକୁ ନେଇ ସମସ୍ତଙ୍କ ସହଯୋଗରେ ଏହାର ସଫଳ ରୂପାୟନ ଲାଗି ପ୍ରୟାସ ଜାରି ରଖିଛନ୍ତି। କର୍ମଶାଳାରେ ଆଞ୍ଚଳିକ ଭେଷଜ ଗବେଷଣା କେନ୍ଦ୍ରର ପ୍ରକଳ୍ପ ଅନୁସନ୍ଧାନ ବୈଜ୍ଞାନିକ ଅନନ୍ୟା ଅନୁରକ୍ତା ପଟ୍ଟନାୟକ ଓ ସହଯୋଗୀ ମୋନିକା ଯୋଗଦେଇ ଏହି ବିବରଣୀ ପ୍ରଦାନ କରିବା ସହ ଉପସ୍ଥିତ ଏନଏସିର ସମସ୍ତ କର୍ମଚାରୀଙ୍କୁ ତାଲିମ୍ ପ୍ରଦାନ କରିଥିଲେ। ଏନ୍ଏସି ଅଧ୍ୟକ୍ଷା ,ଉପାଧ୍ୟକ୍ଷ, ସମସ୍ତ କାଉନସିଲର ଏବଂ କର୍ମଚାରୀ କିପରି ମିଳିମିଶି ଜନସାଧାରଣଙ୍କ ସହଯୋଗରେ ଆଠଗଡକୁ ଫାଇଲେରିଆ ମୁକ୍ତ କରିବା ନିମନ୍ତେ ସଂକଳ୍ପ ନେଇ ଶପଥ ପାଠ କରିଥିଲେ।
