କରୋନା ପଜିଟିଭ ଜାଣି ଦେହରେ ନିଆଁ ଲଗାଇ ଆତ୍ମହତ୍ୟା କଲେ ମହିଳା

ଗ୍ରେଟର ନଏଡା : ପୁଣି ଥରେ ଦେଶରେ କରୋନା ନିଜର କାୟା ବିସ୍ତାର କରି ଚାଲିଛି। କରୋନା ମହାମାରୀ ଲୋକଙ୍କ ମଧ୍ୟରେ ଏଭଳି ଭୟ ବିସ୍ତାର କରିସାରିଲାଣି, ଲୋକେ ରିପୋର୍ଟ ପଜିଟିଭ ଜାଣିବା ମାତ୍ରେ ତାଙ୍କ ଜୀବନ ଶେଷ ହୋଇଯିବ ବୋଲି ଅନୁଭବ କରୁଛନ୍ତି। ଏଭଳି ହିଁ ଏକ ଘଟଣା ଦିଲ୍ଲୀରୁ ଦୂର ଉତ୍ତରପ୍ରଦେଶ ଗ୍ରେଟର ନଏଡାରେ ଘଟିଥିବା ଜଣାପଡିଛି। କରୋନା ରିପୋର୍ଟ ପଜିଟିଭ ଆସିବା ଜାଣି ମହିଳା ଜଣଙ୍କ ନିଆଁରେ ପୋଡି ହୋଇ ଆତ୍ମହତ୍ୟା କରିଛନ୍ତି। ମହିଳାଙ୍କ ବୟସ ୫୨ ବର୍ଷ। ଗ୍ରେଟର ନଏଡାର ବାଦଲପୁର ଅନ୍ତର୍ଗତ ଅଞ୍ଚଳର ଏହି ଘଟଣା। ମହିଳା ଜଣଙ୍କ ନିଜର କରୋନା ଟେଷ୍ଟ କରାଇଥିଲେ। ଗୁରୁବାର ଦିନ ତାଙ୍କ ରିପୋର୍ଟ ପଜିଟିଭ ବୋଲି ଜାଣିବା ପରେ ଚିନ୍ତାଗ୍ରସ୍ତ ହେବା ସହ ଭାଙ୍ଗିପଡି ନିଆଁରେ ପୋଡି ହୋଇ ଆତ୍ମହତ୍ୟା କରିଥିଲେ। ଘଟଣା ବିଷୟରେ ମହିଳାଙ୍କ ସ୍ୱାମୀ ପୁଲିସକୁ ଖବର ଦେଇଥିଲେ। ଖବର ପାଇ ପୁଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ ଆରମ୍ଭ କରିଛନ୍ତି। ଏଯାଏଁ ମହିଳାଙ୍କ ସ୍ୱାମୀ କରୋନା ପଜିଟିଭ କି ନେଗେଟିଭ ସେନେଇ କୌଣସି ସୂଚନା ମିଳିପାରି ନାହିଁ। ପୁଲିସ ଠାରୁ ମିଳିଥିବା ସୂଚନା ଅନୁଯାୟୀ, ୧୧ ତାରିଖରେ ମହିଳାଙ୍କର କୋଭିଡ ପଜିଟିଭ ରିପୋର୍ଟ ଆସିବା ପରେ ସେ ମାନସିକ ବିଷାଦଗ୍ରସ୍ତ ହୋଇ ରହିବା ସହ ଗୁରୁବାର ନିଜ ଦେହରେ ନିଆଁ ଲଗାଇ ଆତ୍ମହତ୍ୟା କରିଛନ୍ତି।