ରେଙ୍ଗାଲି : ରେଙ୍ଗାଲି ଥାନା ଅନ୍ତର୍ଗତ ଜଙ୍ଗଲା ଗ୍ରାମର ଅନୁପମା କୁଅଁର (୪୫) ନାମକ ଜନୈକ ମହିଳା ବାଡି ପଟେ ବାସନ ସଫା କରୁଥିବା ସମୟରେ ଏକ ବିଷଧର ନାଗ ସାପ ତାଙ୍କୁ କାମୁଡି ଦେଇ ଥିଲେ। ପରିବାର ଲୋକେ ତାଙ୍କୁ ଗୁରୁତର ଅବସ୍ଥାରେ ରେଙ୍ଗାଲି ଡାକ୍ତରଖାନାକୁ ଚିକିତ୍ସା ପାଇଁ ଅଣିଥିଲେ। କିନ୍ତୁ ରେଙ୍ଗାଲି ଡାକ୍ତରଖାନାରେ ଡାକ୍ତର ନଥିବାରୁ ଅନୁପମାଙ୍କୁ ସମ୍ବଲପୁର ହେଡକ୍ବାର୍ଟର ହସ୍ପିଟାଲକୁ ନିଆଯାଇଥିଲା । ଅନୁପମାର ଅବସ୍ଥା ସଂକଟାପନ୍ନ ଥିବାରୁ ବୁର୍ଲା ଡାକ୍ତରଖାନାକୁ ପଠାଇଥିଲେ। ବୁର୍ଲା ଡାକ୍ତରଖାନାରେ ପହଞ୍ଚିବା ପୂର୍ବରୁ ଅନୁପମା ମୃତ୍ୟ ବରଣ କରିଥିଲେ।
ରେଙ୍ଗାଲିରେ ଥିବା ଡାକ୍ତରଖାନାରେ ଡାକ୍ତର ନଥିବା ଯୋଗୁଁ ଅନୁପମା ମୃତ୍ୟୁ ବରଣ କଲେ ବୋଲି ପୂର୍ବତନ ଜିଲ୍ଲା ପରିଷଦ ସଭ୍ୟ ତଥା ପୂର୍ବତନ ସରପଞ୍ଚ ଇଂ ଗାନ୍ଧି ବେହେରା ଅଭିଯୋଗ କରିଛନ୍ତି । ବ୍ଲକ ସଦର ମହକୁମାରେ ଥିବା ରେଙ୍ଗାଲି ଡାକ୍ତରଖାନାରେ ଡାକ୍ତର ନିଯୁକ୍ତି ପାଇଁ ଜନସାଧାରଣ ଏବଂ ବିଭିନ୍ନ ଅନୁଷ୍ଠାନ ପକ୍ଷରୁ ବାରମ୍ବାର ଦାବୀ ହେଉଥିଲେ ମଧ୍ୟ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଜନଦାବୀ ପୂରଣ କରୁନାହାନ୍ତି । ଫଳରେ ଏଭଳି ଅଭାବନୀୟ ଘଟଣା ଘଟୁଛି । ଆଖପାଖ ଅଞ୍ଚଳର ୬-୭ ଟି ପଞ୍ଚାୟତର ଲୋକେ ସ୍ବାସ୍ଥ୍ୟ ସେବା ପାଇଁ ରେଙ୍ଗାଲି ଡାକ୍ତରଖାନା ଉପରେ ନିର୍ଭର କରୁଥିବା ବେଳେ ଏଠାରେ ଆବଶ୍ୟକ ସଂଖ୍ୟକ ଡାକ୍ତର ନଥିବା ଅଭିଯୋଗ ହେଉଛି।
