କେଜ୍ରିଓ୍ବାଲ ଯିବେ ରାଜ୍ୟସଭା ! ସାଂସଦ ସଞ୍ଜୀବ ଅରୋରା ଲୁଧିଆନା ଓ୍ବେଷ୍ଟରୁ ଆପ୍ ପ୍ରାର୍ଥୀ
ନୂଆଦିଲ୍ଲୀ: ଦିଲ୍ଲୀ ନିର୍ବାଚନରେ ଆମ୍ ଆଦ୍ମୀ ପାର୍ଟି(ଆପ୍)ର ପରାଜୟ ପରେ ଅରବିନ୍ଦ କେଜ୍ରିୱାଲଙ୍କ ରାଜନୈତିକ ଭବିଷ୍ୟତକୁ ନେଇ ବିଭିନ୍ନ କଳ୍ପନାଜଳ୍ପନା କରାଯାଉଥିଲା। ଏବେ ବିଶେଷ ସୂତ୍ରରୁ ଖବର ଆସିଛି ଯେ, ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ପାଇଁ ସଞ୍ଜୀବ ଆରୋରା ରାଜ୍ୟସଭା ଆସନ ଛାଡ଼ି ପାରନ୍ତି। କୁହାଯାଉଛି ଯେ, ସଞ୍ଜୀବ ଆରୋରାଙ୍କ ସ୍ଥାନରେ ଅରବିନ୍ଦ କେଜ୍ରିୱାଲ ରାଜ୍ୟସଭା ଯାଇପାରନ୍ତି। ଏହିପରି ଭାବେ କେଜ୍ରିୱାଲ ପଞ୍ଜାବରୁ ରାଜ୍ୟସଭା ଯିବା ନିଶ୍ଚିତ ବୋଲି କୁହାଯାଉଛି। ଅପରପକ୍ଷେ, ସଞ୍ଜୀବ ଆରୋରା ଲୁଧିଆନା ଓ୍ବେଷ୍ଟରୁ ଆମ୍ ଆଦମୀ ପାର୍ଟି ପ୍ରାର୍ଥୀ ହେବେ।
ଆପ୍ର ରାଷ୍ଟ୍ରୀୟ ସଂଯୋଜକ ଅରବିନ୍ଦ କେଜ୍ରିୱାଲ ନୂଆଦିଲ୍ଲୀ ବିଧାନସଭା ଆସନରୁ ନିର୍ବାଚନ ଜିତିପାରି ନାହାନ୍ତି। କେଜ୍ରିୱାଲଙ୍କ ପରାଜୟ ସହ ଆପ୍ ମଧ୍ୟ ଦିଲ୍ଲୀ ବିଧାନସଭା ନିର୍ବାଚନରେ ଶୋଚନୀୟ ଭାବେ ପରାଜୟର ସମ୍ମୁଖୀନ ହୋଇଛି। ଗଣମାଧ୍ୟମରେ କେଜ୍ରିୱାଲଙ୍କ ରାଜନୈତିକ ଯାତ୍ରାକୁ ନେଇ ଅନେକ କଳ୍ପନା ଜଳ୍ପନା ଜାରି ରହିଛି। ଇତି ମଧ୍ୟରେ ପଞ୍ଜାବ କଂଗ୍ରେସର ବରିଷ୍ଠ ନେତା ତଥା ବିଧାୟକ ପ୍ରତାପ ସିଂହ ବାଜୱା ଦାବି କରିଥିଲେ ଯେ, କେଜ୍ରିୱାଲ ପଞ୍ଜାବ ବାଟ ଦେଇ ରାଜ୍ୟସଭା ଯାଇପାରନ୍ତି।
ଲୁଧିଆନା ପଶ୍ଚିମ ବିଧାନସଭା ଆସନ ଉପନିର୍ବାଚନ ପାଇଁ ଆମ୍ ଆଦମୀ ପାର୍ଟି ରାଜ୍ୟସଭା ସାଂସଦ ସଞ୍ଜୀବ ଆରୋରାଙ୍କୁ ପ୍ରାର୍ଥୀ କରିଛି। ଏହି ଆସନ ବିଧାୟକ ଗୁରୁପ୍ରୀତ ଗୋଗୀଙ୍କ ମୃତ୍ୟୁ ପରେ ଖାଲି ପଡ଼ିଛି। ସଞ୍ଜୀବ ଆରୋରାଙ୍କୁ ବିଧାନସଭା ନିର୍ବାଚନ ମଇଦାନକୁ ଆଣିବା ପରେ ପଞ୍ଜାବରେ ଗୋଟିଏ ରାଜ୍ୟସଭା ଆସନ ଖାଲି ହୋଇଯିବ। ତେଣୁ ସଞ୍ଜୀବ ଆରୋରାଙ୍କ ସ୍ଥାନରେ ଅରବିନ୍ଦ କେଜ୍ରିୱାଲ ରାଜ୍ୟସଭାକୁ ଯାଇପାରନ୍ତି।
Comments are closed.