ସ୍ତ୍ରୀ ହତ୍ୟାକାରୀ ସ୍ବାମୀ ଗିରଫ, ପାରିବାରିକ କଳହରୁ ତଣ୍ଟି କାଟି ଫେରାର ହୋଇଯାଇଥିଲା

ଯାଜପୁର: ଯାଜପୁର ଜିଲା ବିଞ୍ଝାରପୁର ଥାନା ଗୁଣ୍ଡୁରିପଡା ଗାଁରେ ଗତ ୨୧ ତାରିଖ ବିଳମ୍ବିତ ରାତ୍ରିରେ ମହିଳାଙ୍କୁ ଗଳାକାଟି ହତ୍ୟା ଘଟଣାର ପର୍ଦ୍ଦାଫାଶ କରିଛି ପୁଲିସ। ହତ୍ୟାକାରୀ ଆଉ କେହି ନୁହନ୍ତି, ବରଂ ମହିଳାଙ୍କ ସ୍ୱାମୀ ଦିଗମ୍ବର ଦଳାଇ । ପୁଲିସ ତା’ର ମୋବାଇଲ ଫୋନ ଟ୍ରାକ କରି ତା’କୁ ଗିରଫ କରିବାରେ ସକ୍ଷମ ହୋଇଛି। ପାରିବାରିକ କଳହକୁ କେନ୍ଦ୍ର କରି ଦିଗମ୍ବର ସ୍ତ୍ରୀଙ୍କୁ ହତ୍ୟା କରିଥିବା ଜଣାପଡ଼ିଛି।

ଯାଜପୁର ଏସଡିପିଓ କାର୍ୟ୍ୟାଳୟରେ ମଙ୍ଗଳବାର ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଏସଡିପିଓ ରବୀନ୍ଦ୍ର କୁମାର ଜେନା ଏ ସମ୍ପର୍କରେ ସୂଚନା ଦେଇଛନ୍ତି। ଦିଗମ୍ବର ଗୁଜରାଟରେ କାମ କରୁଥିବାବେଳେ ସ୍ତ୍ରୀ ରୀତାରାଣୀ ନିଜ ଶାଶୁ ଘରେ ରହୁଥିଲେ। ତେବେ ସେ ଘରେ ନିୟମିତ ଭାବେ ଶାଶୁ ଏବଂ ପରିବାରର ଅନ୍ୟ ସଦସ୍ୟମାନଙ୍କ ସହିତ ଝଗଡା କରନ୍ତି । ଏଥିରେ ବ୍ୟସ୍ତବିବ୍ରତ ହୋଇ ଦିଗମ୍ବର ଘଟଣା ଦିନ ରାତ୍ରିରେ ଘରକୁ ଆସିଥିଲା। ବିଳମ୍ବିତ ରାତିରେ ସେ ସ୍ତ୍ରୀଙ୍କ ମୁହଁକୁ ତକିଆରେ ଚାପି ଅଣନିଃଶ୍ଵାସୀ କରି ହତ୍ୟା କରିଥିଲା। ପରେ ସ୍ତ୍ରୀଙ୍କୁ ଘର ବାହାରକୁ ନେଇ ତଣ୍ଟି କାଟିଦେଇ ଫେରାର ହୋଇଯାଇଥିଲା। ପୁଲିସ ସାଇଣ୍ଟିଫିକ୍‌ ଟିମ ସହାୟତାରେ ଘଟଣାର ତଦନ୍ତ କରିଥିଲା। ପରେ ଅଭିଯୁକ୍ତ ଦିଗମ୍ବରର ମୋବାଇଲ ନମ୍ବର ଟ୍ରାକ୍‌ କରି ତାକୁ ଗିରଫ କରିଛି। ତା’ ନିକଟରୁ ଗୋଟିଏ ଛୁରି ଓ ଦୁଇଟି ମୋବାଇଲ ଜବତ କରାଯାଇଛି।