ରେଙ୍ଗାଲି: ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରେଙ୍ଗାଲି ନିର୍ବାଚନମଣ୍ଡଳୀରୁ ସୁଦର୍ଶନ ହରିପାଲଙ୍କ ନାମ ଘୋଷଣା କରିବା ପରେ ପୁରପଲ୍ଲୀରୁ ରାଜଧାନୀ ଯାଏ ସବୁରି ମୁହଁରେ ଗୋଟିଏ ପ୍ରଶ୍ନ ସୁଦର୍ଶନ ହରିପାଲ କିଏ ? ଗଣମାଧ୍ୟମର ପ୍ରତିନିଧିମାନଙ୍କ ପାଖକୁ ଘନଘନ ଫୋନ୍ ସୁଦର୍ଶନ ହରିପାଲ କିଏ? ତାଙ୍କ ବିଷୟରେ ଜାଣିବାକୁ ସମସ୍ତଙ୍କ ଉତ୍କଣ୍ଠା। ଶାସକ ଦଳର ସୁପ୍ରିମୋଙ୍କ ମୁହଁରୁ ସୁଦର୍ଶନ ହରିପାଲ ରେଙ୍ଗାଲି ଆସନ ପାଇଁ ପ୍ରାର୍ଥୀ ବୋଲି ଘୋଷଣା ହେବା ମାତ୍ରେ ବିଜୁଳି ବେଗରେ ଚାରିଆଡେ ଏ ଖବର ପ୍ରସାରିତ ହୋଇ ସୁଦର୍ଶନ ହରିପାଲଙ୍କ ପରିଚୟ ଜାଣିବା ପାଇଁ ସମସ୍ତେ ବ୍ୟଗ୍ର ଯେ, ପ୍ରକୃତରେ ସୁଦର୍ଶନ ହରିପାଲ କିଏ । ଶାସକ ଦଳରୁ ଟିକେଟ ଖଣ୍ଡେ ପାଇବା ସାଧାରଣ କଥା ନୁହେଁ। ରେଙ୍ଗାଲି ଆସନରୁ ବିଜେଡି ଟିକେଟ ପାଇଁ ଅନେକ ରଥୀ ମହାରଥୀ ବିଭିନ୍ନ ନାମୀଦାମୀ ଆଶାୟୀଙ୍କ ପାଇଁ ରାଜଧାନୀରେ ଡେରା ପକାଇ ଲବି କରୁଥିବାବେଳେ ଅନ୍ୟ ଆଶାୟୀଙ୍କଠାରୁ ଅପେକ୍ଷାକୃତ ଅପରିଚିତ ସୁଦର୍ଶନ ହରିପାଲଙ୍କୁ ବିଜେଡି ସୁପ୍ରିମୋ ଟିକେଟ ଦେବା ରାଜନୈତିକ ମହଲ ତଥା ଜନସାଧାରଣରେ ଏବେ ଗଳି କନ୍ଦି ଚା ଦୋକାନ, ପାନ ଦୋକାନ ଆଦି ଖଟିରେ ଚର୍ଚ୍ଚା ଚାଲିଛି ।
ସମ୍ବଲପୁର ଜିଲା ଧନକଉଡା ବ୍ଳକ୍ ଗୋଶାଳା ନିକଟସ୍ଥ ବାବୁବନ୍ଧ ଗ୍ରାମର ଏକ ନିମ୍ନ ମଧ୍ୟବିତ୍ତ ପରିବାରରେ ଜନ୍ମଗ୍ରହଣ କରିଥିବା ସୁଦର୍ଶନଙ୍କ ଶିକ୍ଷାଗତ ଯୋଗ୍ୟତା ଯୁକ୍ତ ଦୁଇ। ୨୦୧୨ ମସିହାରେ ସେ ବିଜେଡିରେ ସାମିଲ ହୋଇଥିଲେ। ୨୦୧୭ରେ ଦଳର ସମସ୍ତ କାର୍ଯ୍ୟକ୍ରମରେ ସକ୍ରିୟ ହୋଇ ଦଳର ସମସ୍ତ କାର୍ଯ୍ୟକ୍ରମର ନେତୃତ୍ବ ନେଇ ଅଂଶ ଗ୍ରହଣ କରିଥିବାରୁ ୨୦୨୨ ଜିଲାପରିଷଦ ନିର୍ବାଚନରେ ବିଜେଡି ପକ୍ଷରୁ ସୁଦର୍ଶନ ହରିପାଲଙ୍କୁ ଧନକଉଡା ଜୋନ୍ (୨) ଜିଲା ପରିଷଦ ଟିକେଟ ଦିଆଯାଇଥିଲା। ଏଥିରେ ସେ ବିଜୟୀ ହୋଇ ଏବେ ଜିଲା ପରିଷଦ ସଭ୍ୟ ଅଛନ୍ତି । ୧୦ବର୍ଷର ରାଜନୈତିକ କ୍ୟାରିୟର ମଧ୍ୟରୁ ମାତ୍ର ୩ ବର୍ଷ ନିର୍ବାଚନ ଲଢେଇର ଅଭିଜ୍ଞତା ଥିବା ସୁଦର୍ଶନ ହରିପାଲଙ୍କ ଉପରେ ବିିଜେଡି ସୁପ୍ରିମୋ ଆସ୍ଥା ପ୍ରକଟ କରି ବିଧାୟକ ହେବା ପାଇଁ ଟିକେଟ ଦେଇଛନ୍ତି। ସୁଦର୍ଶନ ନିର୍ବାଚନ ସମରରେ ବିଜେପି ଏବଂ କଂଗ୍ରେସ ପ୍ରାର୍ଥୀଙ୍କ ସହ ମୁଖ୍ୟତଃ ପ୍ରତିଦ୍ବନ୍ଦ୍ବିତା କରିବେ।
Comments are closed.