ଭୁବନେଶ୍ବର: ନନ୍ଦନକାନନ ପ୍ରାଣୀ ଉଦ୍ୟାନରେ ବାଘୁଣୀ ‘ବିଜୟା’ର ମୃତ୍ୟୁ। ଗତ ୯ରୁ ଅସୁସ୍ଥ ହୋଇ ନନ୍ଦନକାନନରେ ଚିକିତ୍ସାଧିନ ଥିଲା। ବାଘୁଣୀ ‘ବିଜୟା’ ରୋଗାକ୍ରାନ୍ତ ହେବା ପରେ ନନ୍ଦନକାନନ ଓ ଓୟୁଏଟିର ସ୍ବତନ୍ତ୍ର ୪ଜଣିଆ ଡାକ୍ତରୀ ଦଳ ତା’ର ଚିକିତ୍ସା କରୁଥିଲେ। ହେଲେ ଡାକ୍ତରୀ ଦଳ ତା’ର ଜୀବନ ରକ୍ଷା କରିବାରେ ବିଫଳ ହୋଇଛନ୍ତି।
ଗତ ୯ତାରିଖରେ କୌଣସି କାରଣକୁ ନେଇ ବାଘୁଣୀ ‘ବିଜୟା’ ଅସୁସ୍ଥ ହୋଇ ପଡ଼ିଥିଲା। ୧୪ତାରିଖରେ ବାଘୁଣୀ ‘ବିଜୟା’ର ଅବସ୍ଥା ସଙ୍କଟାପନ୍ନ ହେବାରୁ ସ୍ବତନ୍ତ୍ର ଏନକ୍ଲୋଜର ଭିତରରେ ରଖି ତା’ର ପରୀକ୍ଷା ନିରୀକ୍ଷା ସହ ଚିକିତ୍ସା ଚାଲିଥିଲା। ତା’ର ବୟସ ପ୍ରାୟ ୧୨ବର୍ଷ ହୋଇଥିଲା। ଶେଷ ଥର ୩ଟି ଶାବକ ଜନ୍ମ କରିବା ପରେ ସେ ଅସୁସ୍ଥ ହୋଇ ପଡ଼ିଥିଲା। ଏହି ସମୟରେ ତାକୁ ଚିକିତ୍ସା କରାଯାଇଥିଲା ଏବଂ ଚିକିତ୍ସା ପରେ ସେ ସୁସ୍ଥ ହୋଇଯାଇଥିଲା। ହେଲେ ବାଘୁଣୀ ‘ବିଜୟା’ ହଠାତ୍ ପୁଣି ଥରେ ଅସୁସ୍ଥ ହୋଇଥିଲା। ଓୟୁଏଟିର ଏକ ସ୍ବତନ୍ତ୍ର ଡାକ୍ତରୀଦଳ ବାଘୁଣୀ ‘ବିଜୟା’କୁ ଚିକତ୍ସିତ କରୁଥିଲେ ଏବଂ ଚିକିତ୍ସାଧୀନ ଅବସ୍ଥାରେ ବାଘୁଣୀ ‘ବିଜୟା’ର ମୃତ୍ୟୁ ହୋଇଥିଲା।
କେଉଁ କାରଣ ଯୋଗୁଁ ବାଘୁଣୀ ‘ବିଜୟା’ର ମୃତ୍ୟୁ ହୋଇଛି, ତାହା ବ୍ୟବଚ୍ଛେଦ ପରେ ଜଣା ପଡ଼ିବ ବୋଲି ନନ୍ଦନକାନନ କର୍ତ୍ତୃପକ୍ଷ କହିଛନ୍ତି। ବାଘୁଣୀ ‘ବିଜୟା’ ମୃତ୍ୟୁ ପରେ ବର୍ତ୍ତମାନ ନନ୍ଦନକାନନରେ ବାଘ ସଂଖ୍ୟା ୨୫ରେ ପହଞ୍ଚିଛି। ବିଶେଷ କରି ନନ୍ଦନକାନନରେ ପର୍ଯ୍ୟଟକଙ୍କୁ ଆକୃଷ୍ଟ କରିଥାଏ ଧଳା ବାଘ। ଏହି ବାଘକୁ ଦେଖିବାକୁ ପର୍ଯ୍ୟଟକଙ୍କ ଗହଳି ନନ୍ଦନକାନନରେ ଲାଗି ରହିଥାଏ।
