ସମାଜ ଡିଜିଟାଲ ଡେସ୍କ: ଖୁବଶୀଘ୍ର ଆସିବାକୁ ଯାଉଛି ହ୍ବାଟ୍ସଆପ୍ର ଏକ ନୂଆ ଫିଚର। ଏହି ନୂଆ ଫିଚର ଉପରେ ଏବେ କାମ ଚାଲିଥିବା ଜଣାପଡ଼ିଛି। ହ୍ବାଟ୍ସଆପ୍ ଷ୍ଟାଟସ୍ ରି-ଶେୟାର ନାମରେ ଏହି ଫିଚର ଆସୁଛି। ଯେମିତିକି ନାଁରୁ ଜଣାପଡ଼ିଯାଉଛି, ଏହି ଅପ୍ଡେଟ୍ ପରେ ହ୍ବାଟ୍ସଆପ୍ ବ୍ୟବହାରକାରୀ ନିଜ ଷ୍ଟାଟସ୍କୁ ପୁନର୍ବାର ଶେୟାର କରିପାରିବେ। WABetaInfo ରିପୋର୍ଟ ଅନୁଯାୟୀ, ପୂର୍ବରୁ ଏଭଳି ଫିଚର ଇନ୍ଷ୍ଟାଗ୍ରାମରେ ରହିଛି, ଯାହା ଏବେ ହ୍ବାଟ୍ସଆପ୍ ବ୍ୟବହାରକାରୀଙ୍କ ପାଇଁ ଉପଲବ୍ଧ ହେବ। ଖୁବଶୀଘ୍ର ଭାରତୀୟ ୟୁଜରଙ୍କ ପାଇଁ ଉପଲବ୍ଧ ହେବ ଏହି ଫିଚର। ବର୍ତ୍ତମାନ ଏହା ଟେଷ୍ଟିଂ ମୋଡ୍ରେ ଅଛି। ତେବେ ଖୁବଶୀଘ୍ର ହ୍ବାଟ୍ସଆପ୍ ବ୍ୟବହାରକାରୀ ନିଜ ଫଟୋ ଓ ଭିଡିଓକୁ ଷ୍ଟାଟସରେ ପୁନର୍ବାର ଶେୟାର କରିପାରିବେ।
ହ୍ବାଟ୍ସଆପ୍ର ଏହି ଆଗାମୀ ଫିଚର ବିଟା ଭର୍ସନ ଅପଡେଟ୍ରେ ଦେଖିବାକୁ ମିଳିଛି। ହ୍ବାଟ୍ସଆପ୍ ଆଣ୍ଡ୍ରଏଡ୍ ବିଟା ଭର୍ସନ ୨.୨୪.୧.୬.୪ରେ ଷ୍ଟାଟସ୍ ରିଶେୟାରିଂ ଫିଚର ବିଷୟରେ ସୂଚନା ରହିଛି, ଯାହା ମୁତାବକ ହ୍ବାଟ୍ସଆପ୍ ଷ୍ଟାଟସ୍କୁ ପୁନର୍ବାର ଶେୟାର କରିବା ପାଇଁ ଏକ ସର୍ଟକଟ୍ ବଟନ୍ ଦିଆଯିବ। ୟୁଜର ଷ୍ଟାଟସ୍କୁ ପୁନର୍ବାର ଶେୟାର କରିବାବେଳେ ସେଥିରେ କ୍ୟାପ୍ସନ ମଧ୍ୟ ଲେଖିପାରିବେ। ଏଥିସହ ଇମୋଜି ଲଗାଇବାର ଅପ୍ସନ ମଧ୍ୟ ଦିଆଯିବ। ବର୍ତ୍ତମାନ ସମୟରେ ହ୍ବାଟ୍ସଆପ୍ ଷ୍ଟାଟସ୍କୁ ପୁନର୍ବାର ଶେୟାର କରିବାକୁ ହେଲେ ଆପଣଙ୍କୁ ଏହାର ସ୍କ୍ରିନସଟ୍ ନେବାକୁ ପଡ଼ୁଛି। ଏଥିସହ ପୁନର୍ବାର ଅପଲୋଡ୍ କରିବାକୁ ପଡ଼ୁଛି। କିନ୍ତୁ ଶୀଘ୍ର ଏହି ସମସ୍ୟାରୁ ମୁକ୍ତି ମିଳିବ।
