ସମାଜ ଡିଜିଟାଲ ଡେସ୍କ: ହ୍ବାଟ୍ସଆପ୍ ଆଜି ଦୁନିଆରେ ବହୁଳ ବ୍ୟବହୃତ ମେସେଜିଂ ଆପ୍। ଅଫିସ୍ଠାରୁ ଆରମ୍ଭ କରି ବ୍ୟକ୍ତିଗତ ଭାବେ ମଧ୍ୟ ଲୋକେ ହ୍ବାଟ୍ସଆପ୍ର ବ୍ୟବହାର କରୁଛନ୍ତି। ଏହା ଲଞ୍ଚ୍ ହେବା ପରଠାରୁ ଯୋଗଯୋଗର ପଦ୍ଧତିକୁ ବଦଳାଇ ଦେଇଛି। କମ୍ପାନୀ ମଧ୍ୟ ଏଥିରେ ଲଗାତର ଭାବେ ଉନ୍ନତି ଆଣୁଛି। ବିଗତ ବର୍ଷମାନଙ୍କରେ ହ୍ବାଟ୍ସଆପ୍ରେ ଅନେକ ଗୁରୁତ୍ଵପୂର୍ଣ୍ଣ ପରିବର୍ତ୍ତନ ହୋଇଛି। ଏବେ କମ୍ପାନୀ ପୁଣି ଏକସଙ୍ଗେ ଅନେକ ଫିଚର୍ ଆଣିଛି, ଯାହା ଜାଣିବା ପରେ ଆପଣଙ୍କ ହ୍ବାଟ୍ସଆପ୍ର ଅନୁଭୂତି ଦୁଇଗୁଣା ହୋଇଯିବ। ଆସନ୍ତୁ ଜାଣିବା ଏହି ଫିଚରଗୁଡ଼ିକ ବିଷୟରେ..
ଅଡ଼ିଓ ସହ ସ୍କ୍ରିନ୍ ଶେୟାରିଂ:
ହ୍ବାଟ୍ସଆପ୍ ଏହି ଫିଚରକୁ ଦୀର୍ଘ ସମୟ ଧରି ପରୀକ୍ଷା କରୁଥିଲା ଏବଂ ବର୍ତ୍ତମାନ ଏହାର ପବ୍ଲିକ୍ ଅପ୍ଡେଟ୍ ଜାରି କରିଛି। ହ୍ବାଟ୍ସଆପ୍ ବ୍ୟବହାରକାରୀ ଏଣିକି ଭିଡିଓ କଲିଂ ସମୟରେ ଅଡ଼ିଓ ସହ ସ୍କ୍ରିନ୍ ଶେୟାର କରିପାରିବେ। ପୂର୍ବରୁ ସ୍କ୍ରିନ୍ ଶେୟାର ସୁବିଧା ଥିଲା, କିନ୍ତୁ ସ୍କ୍ରିନ୍ ଶେୟାର ସହ ସ୍କ୍ରିନ୍ ଅଡ଼ିଓ ଶେୟାର ସୁବିଧା ନଥିଲା।
ଭିଡିଓ କଲ୍ରେ ଅଧିକ ଲୋକ:
ଭିଡିଓ କଲରେ ହ୍ବାଟ୍ସଆପ୍ ସଦସ୍ୟଙ୍କ ସଂଖ୍ୟା ବୃଦ୍ଧି କରିଛି। ବର୍ତ୍ତମାନ ୩୨ ଜଣ ଲୋକ ଏକସଙ୍ଗେ ଭିଡିଓ କଲ୍ରେ ଯୋଡ଼ି ହୋଇପାରିବେ। ଆପଣ ଉଭୟ ଡେସ୍କଟପ୍ ଏବଂ ମୋବାଇଲରେ ହ୍ବାଟ୍ସଆପ୍ ଭିଡିଓ କଲ୍ ବ୍ୟବହାର କରିପାରିବେ। ଏହି ଫିଚରର ଲାଭ ହେଉଛି, ଏବେ ଆପଣଙ୍କୁ ଭିଡିଓ କଲ୍ ପାଇଁ ଜୁମ୍, ଗୁଗଲ୍ ମିଟ୍ ଭଳି ଆପ୍କୁ ଯିବାକୁ ପଡ଼ିବ ନାହିଁ।
ସ୍ପିକର ସ୍ପଟ୍ଲାଇଟ୍:
ଏଣିକି ନିୟମିତ ମିଟିଙ୍ଗ୍ ଆପ୍ ପରି ହ୍ବାଟ୍ସଆପ୍ରେ ସ୍ପିକରକୁ ଆପଣ ସ୍ପଟ୍ ଲାଇଟ୍ରେ ରଖିପାରିବେ, ଅର୍ଥାତ୍ କଥା ହେଉଥିବା ବ୍ୟକ୍ତି ପୃଥକ ଭାବରେ ଦୃଶ୍ୟମାନ ହେବେ। ହ୍ବାଟ୍ସଆପ୍ ଏବେ ସ୍ପିକରକୁ ଅଟୋମେଟିକ୍ ହାଇଲାଇଟ୍ କରିବ। ଏହାଦ୍ଵାରା ଭିଡିଓ କଲରେ ଥିବା ଲୋକଙ୍କ ପାଇଁ ଜାଣିବା ସହଜ ହେବ ଯେ କିଏ କହୁଛନ୍ତି।
ଉନ୍ନତ ଅଡ଼ିଓ ଏବଂ ଭିଡିଓ କ୍ଵାଲିଟି:
ହ୍ବାଟ୍ସଆପ୍ ଦୀର୍ଘ ଦିନ ଧରି ଅଡିଓ ଏବଂ ଭିଡିଓ କ୍ଵାଲିଟିକୁ ଉନ୍ନତ କରିବା ପାଇଁ କାମ କରୁଛି। ନୂଆ ଅପ୍ଡେଟ୍ ସହିତ MLow କୋଡେକ୍ ସପୋର୍ଟ ଦିଆଯାଇଛି। ଏହାଦ୍ଵାରା ବ୍ୟବହାରକାରୀଙ୍କୁ ନଏଜ୍ କ୍ୟାନ୍ସଲେସନ୍, ସ୍ପଷ୍ଟ ସ୍ଵର ମିଳିବ। ଏହା ବ୍ୟତୀତ ଇକୋ କ୍ୟାନ୍ସଲେସନ୍ ମଧ୍ୟ ମିଳିବ।
