ନୂଆଦିଲ୍ଲୀ : ଗତ କିଛି ଦିନ ମଧ୍ୟରେ ଉତ୍ତର ଭାରତର ଅନେକ ରାଜ୍ୟରେ ତାପମାତ୍ରା ବୃଦ୍ଧି ପାଉଥିବା ଦେଖାଯାଇଛି। ଏହାମଧ୍ୟରେ ରାତି ତାପମାତ୍ରା ମଧ୍ୟ ୭ ଡିଗ୍ରୀରୁ ୧୨ ଡିଗ୍ରୀ ପର୍ଯ୍ୟନ୍ତ ପହଞ୍ଚିଛି। ପାଣିପାଗ ବିଭାଗ ଅନୁଯାୟୀ, ଆସନ୍ତା ୪ ଦିନରେ ତାପମାତ୍ରା ବୃଦ୍ଧି ପାଇପାରେ। ମାତ୍ର ଫେବ୍ରୁଆରୀ ୧୭ ବେଳକୁ ପୁଣି ଥରେ ଉତ୍ତର ଭାରତର ଅନେକ ଅଞ୍ଚଳରେ ପାଶ୍ଚାତ୍ୟ ବିଶୃଙ୍ଖଳା ସକ୍ରିୟ ହେବାର ସମ୍ଭାବନା ରହିଛି। ଏହି ସମୟ ମଧ୍ୟରେ କେବଳ ପ୍ରବଳ ବର୍ଷା ନୁହେଁ ବରଂ ପାହାଡିଆ ଅଞ୍ଚଳରେ ବରଫ ବର୍ଷା ସହ ଅନେକ ସ୍ଥାନରେ କୁଆପଥର ବର୍ଷା ହେବାର ମଧ୍ୟ ସମ୍ଭାବନା ରହିଛି। ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ, ଏହି ପାଶ୍ଚାତ୍ୟ ବିଶୃଙ୍ଖଳା ସକ୍ରିୟ ରହିବା ପରେ ପୁଣି ଥରେ ତାପମାତ୍ରାରେ ହ୍ରାସ ହେବ।
ଭାରତୀୟ ପାଣିପାଗ ବିଭାଗ ମହାନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ରଙ୍କ ସୂଚନାନୁଯାୟୀ, କିଛି ସ୍ଥାନରେ ପ୍ରବଳ ବର୍ଷା ,ପାହାଡିଆ ଅଞ୍ଚଳରେ ବରଫ ବର୍ଷା ସହ ଅନେକ ସ୍ଥାନରେ କୁଆପଥର ବର୍ଷା ହେବାର ମଧ୍ୟ ସମ୍ଭାବନା ରହିଛି। ଏହାସହ ୩ ରୁ ୪ ଦିନ ପର୍ଯ୍ୟନ୍ତ ଏଭଳି ପାଗ ଲାଗି ରହିବ। ଚଳିତ ସପ୍ତାହ ଶୁକ୍ରବାର ଠାରୁୁ ଆସନ୍ତା ସୋମବାର ପର୍ଯ୍ୟନ୍ତ ପାଗରେ ପରିବର୍ତ୍ତନ ଦେଖାଦେବ। ବର୍ତ୍ତମାନ ସମୟରେ ଉତ୍ତର ଭାରତରେ ରାତି ତାପମାତ୍ରା ୭ ଡିଗ୍ରୀରୁ ୧୩ ଡିଗ୍ରୀ ପର୍ଯ୍ୟନ୍ତ ରହିଛି। ଏହି ସପ୍ତାହ ଶେଷ ବେଳକୁ ପାଶ୍ଚାତ୍ୟ ବିଶୃଙ୍ଖଳା ଫଳରେ ତାପମାତ୍ରା ପୁଣି ଥରେ ହ୍ରାସ ହୋଇପାରେ। ଏକଦମ୍ ତାପମାତ୍ରା କମିବା ନେଇ ବର୍ତ୍ତମାନ କହିବା ସମ୍ଭବ ନୁହେଁ ବୋଲି ମହାନିର୍ଦ୍ଦେଶକ କହିଛନ୍ତି।
