ନୂଆଦିଲ୍ଲୀ : ଟାଟା ସମୂହର ଭିସ୍ତାରା ନିଜ ବିମାନ ସଂଖ୍ୟା ହ୍ରାସ କରିବାକୁ ନିଷ୍ପତ୍ତି ନେଇଛି । ତେବେ ଏହା ଏକ ଅସ୍ଥାୟୀ ନିଷ୍ପତ୍ତି । ଲଗାତର କିଛି ଦିନ ହେବ ଭିସ୍ତାରା ଏୟାରଲାଇନ୍ସର ବିମାନ ରଦ୍ଦ ହେଉଛି ବା ଉଡାଣରେ ବିଳମ୍ବ ହେଉଛି । ଏହି କାରଣରୁ ଯାତ୍ରୀଙ୍କୁ ଅନେକ ସମସ୍ୟାର ସମ୍ମୁଖୀନ ହେବାକୁ ପଡୁଛି । ଏବେ କମ୍ପାନୀ ଏହାକୁ ସ୍ବୀକାର କରି ବିମାନ ସଂଖ୍ୟା ହ୍ରାସ କରିବାକୁ ନିଷ୍ପତ୍ତି ନେଇଛି । କହିରଖୁଛୁ ଭିସ୍ତାରା ଏବଂ ଏୟାର ଇଣ୍ଡିଆର ମିଶ୍ରଣ ପାଇଁ ପ୍ରସ୍ତାବ ସାମ୍ନାକୁ ଆସିଛି ।
ଟାଟା ସମୂହ ଏବଂ ସିଙ୍ଗାପୁର ଏୟାରଲାଇନର ମିଳିତ ଉଦ୍ୟେଗ ଭିସ୍ତାରା ଏୟାରଲାଇନ୍ସର ଯାତ୍ରୀ ଗତ କିଛି ଦିନରେ ସାମାଜିକ ଗଣମାଧ୍ୟମରେ ବିମାନ ରଦ୍ଦ ହେବା ଏବଂ ଉଡାଣ ବିଳମ୍ବ ହେବା ନେଇ ଉଲ୍ଲେଖ କରିଆସୁଛନ୍ତି । ସୋମବାର କମ୍ପାନୀ ମଧ୍ୟ ଏହା ସ୍ବୀକାର କରିଥିଲା । ଏୟାରଲାଇନ୍ସର ମୁଖପାତ୍ର କହିଛନ୍ତି କି ଗତ କିଛି ଦିନରେ ଭିନ୍ନ ଭିନ୍ନ କାରଣରୁ ବିମାନ ରଦ୍ଦ ବା ବିଳମ୍ବ ହେଉଛି । ସେ ଏହା ମଧ୍ୟ କହିଛନ୍ତି କି କମ୍ପାନୀ ଅସ୍ଥାୟୀ ରୂପେ ବିମାନ ସଂଖ୍ୟା ହ୍ରାସ କରିବା ଉପରେ ଆଲୋଚନା କରୁଛି ଏବଂ ଏହାକୁ କାର୍ଯ୍ୟକାରୀ କରାଯିବ ।
