ଶତ୍ରୁତା ସତ୍ୱେ ଭାଇଚାରାରେ ବାନ୍ଧିହୋଇଛନ୍ତି ଆମେରିକା-ଋଷ ସୈନ୍ୟ

ଡେସ୍କ: ଆମେରିକା ଏବଂ ଋଷ ପରସ୍ପରର ଶତ୍ରୁ ରାଷ୍ଟ୍ର ବୋଲି କାହାକୁ ଅଛପା ନାହିଁ। ୟୁକ୍ରେନ ଯୁଦ୍ଧ ପରଠାରୁ ଏହି ଦୁଇ ଦେଶ ମଧ୍ୟରେ ତିକ୍ତତା ପ୍ରବଳ ମାତ୍ରାରେ ବୃଦ୍ଧି ପାଇଛି। ରୁଷ ପକ୍ଷରୁ ୟୁକ୍ରେନ ଉପରେ ଆକ୍ରମଣ କରାଯିବା ପରେ ଆମେରିକା ଏହାର ପ୍ରମୁଖ ପ୍ରତିଦ୍ୱନ୍ଦ୍ୱୀ ରାଷ୍ଟ୍ର ଋଷ ଉପରେ ଏକାଧିକ ପ୍ରତିବନ୍ଧକ ଲଗାଇଛି। ଅନେକ ଥର ଉଭୟ ଦେଶ ମଧ୍ୟରେ ମୁହାଁମୁହିଁ ସ୍ଥିତି ମଧ୍ୟ ଉପୁଜିଛି। କିନ୍ତୁ ଏହାରି ଭିତରେ ଏକ ଭିନ୍ନ ଭାଇଚାରା ଦୃଶ୍ୟ ଦେଖିବାକୁ ମିଳିଛି ଦୁଇ ଦେଶର ସୈନ୍ୟଙ୍କ ମଧ୍ୟରେ। ଗୋଟିଏ ଦେଶରେ ଗୋଟିଏ ସେନା ଘାଟିରେ ଏକାଠି ରହି ନିଜ ନିଜ କାମ କରୁଛନ୍ତି ଆମେରିକା ଏବଂ ଋଷର ସୈନ୍ୟମାନେ।
ଏହି ଦୁଇ ଦେଶର ସୈନ୍ୟ ଯେଉଁଠାରେ ଏକାଠି ରହି କାର୍ଯ୍ୟ କରୁଛନ୍ତି ତାହା ହେଉଛି ଆଫ୍ରିକୀୟ ଦେଶ ନାଇଜର। ଆମେରିକା ଗଣମାଧ୍ୟମ ରିପୋର୍ଟ ଅନୁସାରେ, ଆମେରିକା ଏବଂ ଋଷ ସୈନ୍ୟ ଅନେକ ସପ୍ତାହ ଧରି ନାଇଜରର ଏୟାରବେସ୍‌‌ ୧୦୧ରେ ରହିଆସୁଛନ୍ତି। ଦୀର୍ଘ ଦିନ ଧରି ଏକାଠି କାମ କରୁଥିବାରୁ ଦୁଇ ଦେଶର ସୈନ୍ୟଙ୍କ ମଧ୍ୟରେ ଭାଇଚାରା ବୃଦ୍ଧି ପାଇଛି।
୨୦୨୩ରେ ନାଇଜରରେ ସରକାର ବଦଳିଥିଲା। ନାଇଜରର ସେନା ଜୁଣ୍ଟା କ୍ଷମତାକୁ ଆସିଥିଲା। ଏହା ପରଠାରୁ ନୂଆ ସରକାର ଆମେରିକୀୟ ସୈନ୍ୟଙ୍କୁ ଦେଶରୁ ବାହାର କରିବାକୁ ଉଦ୍ୟମ ଚଳାଇଛି। ୨୦୧୪ରେ ଆମେରିକା ଏବଂ ନାଇଜର ମଧ୍ୟରେ ହୋଇଥିବା ବୁଝାମଣା ଅନୁସାରେ, ଆମେରିକୀୟ ସେନା ଏବଂ ସରକାରୀ କର୍ମଚାରୀ ନାଇଜରରେ ମୁତୟନ ହୋଇପାରିବେ। ବର୍ତ୍ତମାନ କ୍ଷମତା ପରିବର୍ତ୍ତନ ହେବା ପରେ ଉକ୍ତ ବୁଝାମଣାକୁ ନାଇଜରର ନୂଆ ସରକାର ପ୍ରତ୍ୟାହାର କରିନେଇଛି। ସରାକର ବଦଳିବା ପରେ ଆମେରିକୀୟ ସୈନ୍ୟଙ୍କୁ ବିରୋଧ କରାଯିବା ସହିତ ଦେଶ ଛାଡ଼ି ଚାଲିଯିବାକୁ କୁହାଯାଇଛି।
ଅନ୍ୟପଟେ ଋଷର ପ୍ରତିରକ୍ଷା ମନ୍ତ୍ରଣାଳୟ ନାଇଜର ସହିତ ସୈନ୍ୟ ସହଯୋଗ ବୃଦ୍ଧି କରିବା ନେଇ ଗତ ଜାନୁୟାରୀରେ ଘୋଷଣା କରିଥିଲା। ଫଳରେ ନାଇଜର ସେନାଙ୍କୁ ପ୍ରଶିକ୍ଷଣ ଦେବା ଲାଗି ଋଷ ଏହାର ୧୦୦ ଜଣ ପ୍ରଶିକ୍ଷିତ ସୈନ୍ୟଙ୍କୁ ପଠାଇବାକୁ ଘୋଷଣା କରିଥିଲା। ଏହା ପରେ ଋଷ ସୈନ୍ୟ ନାଇଜରରେ ରହୁଛନ୍ତି। ପୂର୍ବରୁ ଆମେରିକୀୟ ସୈନ୍ୟ ୧୦୧ ଏୟାରବେସ୍‌‌ରେ ରହୁଥିଲାବେଳେ ଏବେ ସେଠାରେ ଋଷ ସୈନ୍ୟ ବି ରହୁଛନ୍ତି।