ପରିବେଶର ସଂରକ୍ଷଣରେ ’କୋପ-୧୪’ ଗୁରୁତ୍ବପୂର୍ଣ୍ଣ ଭୂମିକା ତୁଲାଇବ : ଜାବଡେକର

ନୂଆଦିଲ୍ଲୀ : ସ୍ଥଳଭାଗ ମରୁଭୂମିରେ ପରିଣତ ଭଳି ସ୍ଥିତିକୁ ରୋକିବା ପାଇଁ ଜାତିସଂଘ ସମ୍ମିଳନୀ ଅଧୀନରେ ଚତୁର୍ଦ୍ଦଶ କନ୍‍ଫରେନ୍ସ ଅଫ୍‍ ପାର୍ଟିଜ୍‍- କୋପ-୧୪,  ଗ୍ରେଟର୍‍ ନୋଇଡ଼ାରେ ଆରମ୍ଭ ହୋଇଛି । ଭାରତ ଦୁଇ ବର୍ଷ ପାଇଁ ଏଥିରେ ଅଧ୍ୟକ୍ଷତା କରୁଛି। କେନ୍ଦ୍ର ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ପ୍ରକାଶ ଜାବଡେକର, ସ୍ଥଳ ପରିବେଶ ଓ ମୋଟାମୋଟି ପରିବେଶର ସଂରକ୍ଷଣ ପାଇଁ ସକାରାତ୍ମକ ମନୋଭାବ ପୋଷଣ କରିଛନ୍ତି ।  କୋପ-୧୪ର ଲକ୍ଷ୍ୟ ହେଉଛି ସ୍ଥାୟୀ ସ୍ଥଳ ପରିଚାଳନା, ସ୍ଥଳଭାଗ ଅବନତିର ସୁରକ୍ଷା, ମରୁଡ଼ି ଦୂରୀକରଣ, ଭୂମିକୁ ମରୁଭୂମିରେ ପରିଣତ ହେବାକୁ ରୋକିବା ଓ ଧୂଳିଝଡ଼ ସମସ୍ୟାର ସମାଧାନ କରିବା ବୋଲି ସେ କହିଛନ୍ତି। ପୂର୍ଣ୍ଣାଙ୍ଗ ଅଧିବେଶନରେ ଉଦ୍‍ବୋଧନ ଦେଇ ସେ କହିଛନ୍ତି, କୋପ-୧୪ କୃଷି, ବନୀକରଣ, ଜମି, ଜଳ ପରିଚାଳନା ଓ ଦାରିଦ୍ର୍ୟ ଦୂରୀକରଣ ଭଳି କାର୍ଯ୍ୟକ୍ରମଗୁଡ଼ିକରେ ସମନ୍ୱୟ ଆଣିବା ସହ ଏଗୁଡ଼ିକୁ ଆଗକୁ ଆଗେଇ ନେଇପାରିବ। ଫଳସ୍ୱରୂପ, ସ୍ଥାୟୀ ବିକାଶ ଲକ୍ଷ୍ୟ ସମ୍ଭବ ହେବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଆସନ୍ତା ୯ ତାରିଖରେ ଉଚ୍ଚସ୍ତରୀୟ ବିଭାଗର ଉଦ୍‍ଘାଟନୀ ଅଧିବେଶନର  ଶୁଭାରମ୍ଭ କରିବେ। ଏହାସହ ଅନେକ କାର୍ଯ୍ୟକ୍ରମ ଓ ପ୍ରଦର୍ଶନୀର ଆୟୋଜନ କରାଯିବ। ଏଥିରେ ସ୍ଥଳଭାଗକୁ ମରୁଭୂମିରେ ପରିଣତ ହେବାକୁ ରୋକିବା ଓ ମରୁଡ଼ି ଭଳି ପରିସ୍ଥିତିକୁ ଏଡାଇବାପାଇଁ ଭାରତର ଉଦ୍ୟମ ଓ ଭବିଷ୍ୟତର କାର୍ଯ୍ୟପନ୍ଥାର ପ୍ରଦର୍ଶନ ହେବ। ଭାରତୀୟ ପାଭିଲିୟନ୍‍ରେ ମଧ୍ୟ ଜଳ, ସ୍ଥଳ, ଶକ୍ତି, ଜୈବ ବିବିଧତା, ଜଳବାୟୁ ପରିବର୍ତ୍ତନ ଏବଂ ବିଜ୍ଞାନ ଓ ବୈଷୟିକ ଜ୍ଞାନ କ୍ଷେତ୍ରରେ ଭାରତର ସଫଳତାର ପ୍ରଦର୍ଶନ ହେବ।

Comments are closed.