ନୂଆଦିଲ୍ଲୀ : ବୟସ ମାତ୍ର ୬ ବର୍ଷ, ହେଲେ ଆୟ ବର୍ଷକୁ ୭୫ କୋଟି। ଆଶ୍ଚର୍ଯ୍ୟ ଲାଗୁଥିଲେ ବି ଏହା ସମ୍ପୂର୍ଣ୍ଣ ସତ୍ୟ। ୟୁ-ଟ୍ୟୁବ୍ରେ ଖେଳଣା ସମୀକ୍ଷା (ରିଭ୍ୟୁ) କରି ରୟାନ ନାମକ ଜଣେ ୬ ବର୍ଷ ବୟସର ବାଳକ ବର୍ଷକୁ ୭୫ କୋଟି ଟଙ୍କା ଆୟ କରିପାରିଛି। ୟୁ-ଟ୍ୟୁବ୍ରେ ଲୋକପ୍ରିୟତା ହାସଲ ପରେ ରୟାନ ଏବେ ଖେଳଣା ବ୍ୟବସାୟରେ ପାଦ ଥାପିଛି। ଏନେଇ ରୟାନ ୱାଲମାର୍ଟ ସହ ଏକ ରାଜିନାମାପତ୍ର ସ୍ୱାକ୍ଷର କରିଛନ୍ତି। ଏହି ରାଜିନାମା ଅନୁସାରେ ରୟାନ ଏବେ ଖେଳଣା ସମୀକ୍ଷା ସହ ଖେଳଣା ବିକିବ। ୱାଲମାର୍ଟର ୨୫୦୦ ଆମେରିକୀୟ ଷ୍ଟୋର ଏବଂ ୱେବସାଇଟରେ ରୟାନ ବ୍ରାଣ୍ଡର ଖେଳଣା ବିକ୍ରି କରାଯିବ। ଏହାପରେ ଅକ୍ଟୋବରରୁ ରୟାନ ୱାର୍ଲ୍ଡ ଆରମ୍ଭ କରାଯିବ।
ଉଲ୍ଲେଖ ଯୋଗ୍ୟ ଯେ ରୟାନ ୟୁ-ଟ୍ୟୁବ୍ରେ ଖେଳଣା ସମୀକ୍ଷା କରୁଥିବା ଭିଡିଓ ଅପଲୋଡ କରେ। ଏହି ଭିଡ଼ିଓକୁ ୟୁ-ଟ୍ୟୁବରେ ଲକ୍ଷାଧିକ ଲୋକେ ଦେଖୁଛନ୍ତି। ଏହି କ୍ରମରେ ଗତ ବର୍ଷ ରୟାନ ୧୧ ନିୟୁତ ଡଲାର (ଅର୍ଥାତ ୭୫ କୋଟି ଟଙ୍କା) ଆୟ କରିଛି। ୟୁ-ଟ୍ୟୁବ୍ର ଶିଶୁ ତାରକା ରୟାନର ଚ୍ୟାନେଲ ହେଉଛି ‘ରୟାନ ଟଏଜ ରିଭ୍ୟୁ’। ୟୁ-ଟ୍ୟୁବ୍ ଚ୍ୟାନେଲରୁ ଆୟ କରିବା ମାମଲରେ ଗତବର୍ଷ ରୟାନ ୮ମ ସ୍ଥାନରେ ଥିଲା। ରୟାନ ଚ୍ୟାନେଲର ସବସ୍କ୍ରାଇବର ସଂଖ୍ୟା ୧୫ ନିୟୁତ ରହିଛି।
