ନୋଏଡ଼ା: ନୋଏଡ଼ା ସେକ୍ଟର-୯୩ଏର ସୁଉଚ୍ଚ ସୁପରଟେକ୍ ଟ୍ବିନ୍ ଟାୱାରକୁ ରବିବାର ଧ୍ବଂସ କରି ଦିଆଯାଇଛି। ଏହାର ନିର୍ମାଣ ପାଇଁ ୯ବର୍ଷ ସମୟ ଲାଗିଥିବା ବେଳେ ମାତ୍ର ୯ ସେକେଣ୍ଡରେ ଦୁଇ ସୁଉଚ୍ଚ ଅଟ୍ଟାଳିକା ଧରାଶାୟୀ ହୋଇଛି। ଦେଶରେ ପ୍ରଥମ ଥର ପାଇଁ ଏତେ ବଡ଼ ଅଟ୍ଟାଳିକାକୁ ଧ୍ବଂସ କରାଯାଇଛି। ୩୨ ଓ ୩୦ ମହଲା ବିଶିଷ୍ଟ ଦୁଇ ଟାୱାରକୁ ଧ୍ବଂସ କରିବା ପାଇଁ ୩,୭୦୦ କିଲୋ ବିସ୍ଫୋରକ ବ୍ୟବହୃତ ହୋଇଛି। ୱାଟରଫଲ୍ ଇମ୍ପ୍ଲୋଜନ କୋଲାପ୍ସ ମେକାନିଜିମ୍ ସାହାଯ୍ୟରେ ଏହାକୁ ଭଙ୍ଗାଯାଇଛି। ଆପେକ୍ସ ଅଟ୍ଟାଳିକାର ଉଚ୍ଚତା ୧୦୩ ମିଟର ହୋଇଥିବାବେଳେ ସିୟେନ ଅଟ୍ଟାଳିକାର ଉଚ୍ଚତା ଥିଲା ୯୭ ମିଟର। ଦୁଇ ଅଟ୍ଟାଳିକାର ନିର୍ମାଣ ଖର୍ଚ୍ଚ ୭୦ କୋଟି ଟଙ୍କା ହୋଇଥିବା ବେଳେ ଏହାକୁ ଭାଙ୍ଗିବା ପାଇଁ ୨୦ କୋଟି ଟଙ୍କା ଖର୍ଚ୍ଚ ହୋଇଥିବା କୁହାଯାଉଛି।
#WATCH | Once taller than Qutub Minar, Noida Supertech twin towers, reduced to rubble pic.twitter.com/vlTgt4D4a3
— ANI (@ANI) August 28, 2022
ଏହି ସୁଉଚ୍ଚ ଅଟ୍ଟାଳିକା ଭାଙ୍ଗିବା ସମୟରେ ସେହି ଅଞ୍ଚଳରେ ବହୁମାତ୍ରାରେ ଧୂଳି ଉଡ଼ିବାର ସମ୍ଭାବନା ଥିବାରୁ ତାହାକୁ ନିୟନ୍ତ୍ରଣ କରିବା ପାଇଁ ସଫେଇ ମେସିନ, ଆଣ୍ଟି ସ୍ମଗ୍ ଗନ ଏବଂ ପାଣି ସିଞ୍ଚନ ଯନ୍ତ୍ର ଆଦିର ବ୍ୟବସ୍ଥା କରାଯାଇଥିଲା। ବର୍ତ୍ତମାନ ସୁଦ୍ଧା ଆଖପାଖରେ ଥିବା ଘରର କୌଣସି କ୍ଷୟକ୍ଷତି ହୋଇନଥିବା ଜଣାପଡ଼ିଛି।
ସୂଚନାଯୋଗ୍ୟ, ବେଆଇନ ଭାବେ ନିର୍ମିତ ଟ୍ବିନ୍ ଟାୱାରକୁ ଧ୍ବଂସ କରିବା ପାଇଁ ସୁପ୍ରିମକୋର୍ଟ ନିର୍ଦେଶ ଦେଇଥିଲେ।
