ତୁଷୁରା : ବଲାଙ୍ଗିର ଜିଲା ତୁଷୁରା ଥାନା ଅନ୍ତର୍ଗତ ଜାମୁଟ ହାଇସ୍କୁଲ ନିକଟରେ ମଙ୍ଗଳବାର ଏକ ଧାନ ବୋଝେଇ ଗାଡ଼ି ଦୁର୍ଘଟଣାଗ୍ରସ୍ତ ହୋଇଛି। ତେବେ ଏହି ଦୁର୍ଘଟଣାରେ ଚାଳକ ଅଳ୍ପକେ ବର୍ତ୍ତିଯାଇଥିବା ସୂଚନା ମିଳିଛି। ଦୁର୍ଘଟଣାଗ୍ରସ୍ତ ଗାଡ଼ିଟି ବୌଦ୍ଧ, କନ୍ଧମାଳ, କଳାହାଣ୍ଡି ଜିଲାର ସୀମାନ୍ତ ଗାଁଗୁଡ଼ିକରୁ ଚୋରା ଧାନ ତୁଷୁରାର ଏକ ରାଇସ ମିଲ୍କୁ ଆଣୁଥିବା ଚର୍ଚ୍ଚା ହେଉଛି।
ଅନ୍ୟପକ୍ଷରେ ଗାଡ଼ିଟି କେଉଁ ସ୍ଥାନରୁ ଆସି ଆଉ କେଉଁ ସ୍ଥାନରୁ ଧାନ ଆଣି କେଉଁ ସ୍ଥାନକୁ ଯାଉଥିଲା ତାହାକୁ ନେଇ କୌଣସି ସ୍ପଷ୍ଟ ସୂଚନା ଡ୍ରାଇଭର ଦେଉ ନ ଥିବାରୁ ଚୋରାଚାଲାଣ ହେଉଥିବା ବାରି ହେଉଛି। ଏହାକୁ ନେଇ ସନ୍ଦେହ ସୃଷ୍ଟି ହେଉଛି। ଏହି ବିଷୟରେ ତୁଷୁରା ତହସିଲଦାର ଆର୍ତ୍ତତ୍ରାଣ ଥାଟିଙ୍କୁ ପଚରାଯିବାରୁ ଘଟଣାକୁ ହାଲୁକା ଭାବେ ନେଇ ମୁଁ ଗୋଟିଏ କାର୍ଯ୍ୟକ୍ରମକୁ ଆସିଛି, ନିକଟରେ ଥିବା ପେକ୍ସର ସମ୍ପାଦକଙ୍କୁ ପଚାରନ୍ତୁ ବୋଲି କହିଛନ୍ତି। ସେହିପରି ଥାନା ଅଧିକାରୀ ମନୋଜ ପଧାନଙ୍କୁ ପଚାରିବାରୁ ତଦନ୍ତ କରୁଛି ବୋଲି କହିଛନ୍ତି। ଏଣୁ ଏ ଦିଗରେ ଜିଲା ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
Comments are closed.