ସମାଜ ଡିଜିଟାଲ ଡେସ୍କ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଉପରେ ୫୦ ପ୍ରତିଶତ ଶୁଳ୍କ ଲାଗୁ କରିବା ପରେ ଅଦାଲତ ଟ୍ରମ୍ପଙ୍କୁ କଡ଼ା ଭର୍ତ୍ସନା କରିଥିଲେ। ଏହି ପଦକ୍ଷେପ ଅବୈଧ ବୋଲି କୋର୍ଟ ଘୋଷଣା କରିଥିଲେ। ଟ୍ରମ୍ପ ନିଜ ସୀମା ଲଂଘନ କରି ଜରୁରିକାଳୀନ ଶକ୍ତିର ଦୁରୁପଯୋଗ କରିଥିବା କୋର୍ଟ କହିଥିଲେ।
ତେବେ ଟ୍ରମ୍ପ ପ୍ରଶାସନ ଅଦାଲତରେ ସତ୍ୟପାଠ ଦାଖଲ କରି କହିଛି ଯେ, ଭାରତ ସହିତ ଅନେକ ଦେଶ ଉପରେ ଲଗାଯାଇଥିବା ଟାରିଫ ହଟାଇବା ଫଳରେ ବାଣିଜ୍ୟିକ ସମସ୍ୟା ଉତ୍ପନ୍ନ ହେବ ଏବଂ ବିଦେଶରେ ଶାନ୍ତି ପ୍ରତିଷ୍ଠା କରିବାର ପ୍ରୟାସ ଦୁର୍ବଳ ହୋଇଯିବ। ଟ୍ରମ୍ପ ପ୍ରଶାସନ ପକ୍ଷରୁ ତଳ କୋର୍ଟର ଆବେଦନକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଏଭଳି ସତ୍ୟପାଠ ଦାଖଲ କରିଛି। ସଲିସିଟର ଜେନେରାଲ ଜନ ସାୟର ସତ୍ୟପାଠ ଜରିଆରେ ଶୁଳ୍କ ବଳବତ୍ତର ରଖିବାକୁ ନିବେଦନ କରିଛନ୍ତି।
ଟ୍ରମ୍ପ ପ୍ରଶାସନ କହିଛି, ରୁଷ-ୟୁରେକ୍ରନ ଯୁଦ୍ଧକୁ ନେଇ ଜାରି ହୋଇଥିବା ଜାତୀୟ ଜରୁରିକାଳୀନ ପରିସ୍ଥିତିର ମୁକାବିଲା ପାଇଁ ଭାରତ ଉପରେ ଟାରିଫ ଲଗାଯାଇଛି। କାରଣ ଭାରତ ରୁଷଠାରୁ ବିପୁଳ ମାତ୍ରାରେ ତୈଳ ଅମଦାନୀ କରୁଛି। ଏହି ଶୁଳ୍କ ପ୍ରତ୍ୟାହାର କରାଯିବା ଅର୍ଥ ଆମେରିକାକୁ ଆର୍ଥିକ କ୍ଷତିଗ୍ରସ୍ତ ଭିତରକୁ ଠେଲିଦେବା ସହିତ ସମାନ ହେବ।
