ଚେନ୍ନାଇ .-ଟ୍ରେନରୁ ଖସିଯାଉଥିବା ଜଣେ ନାବାଳିକାକୁ ଜଣେ ଆରପିଏଫ୍ କନେଷ୍ଟବଳ ଏସ୍ବି ଯୋଶ୍ ବଞ୍ଚାଇ ଦେବାର ଭିଡିଓ ଭାଇରାଲ ହୋଇଛି । ଏହାପରେ ସମସ୍ତେ କନେଷ୍ଟବଳଙ୍କର ଏହି ଭଲ କାମକୁ ବେଶ୍ ପ୍ରଶଂସା କରିଛନ୍ତି । ପ୍ଲାଟଫର୍ମରେ ଚାଲୁଥିବା ଏକ ଟ୍ରେନରେ ଜଣେ ୧୦ ବର୍ଷିୟା ନାବାଳିକା ଚଢିବାକୁ ଚେଷ୍ଟା କରିଥିଲା । ଏତିକି ବେଲେ ଚଳନ୍ତା ଟ୍ରେନ୍ରୁ ତାହାର ପାଦ ଖସିଯାଇଥିଲା । ସେ ତଳକୁ ଖସିଯାଉଥିବା ବେଳେ ସେଠାରେ ଉପସ୍ଥିତ ଥିବା ଜଣେ ଆର୍ପିଏଫ୍ କନେଷ୍ଟବଳ ଏସ୍ବି ଯୋଶ୍ ତାକୁ ଉପରକୁ ଉଠାଇ ନେଇଥିଲେ । ସେଠାରେ ଲାଗିଥିବା ସିସିଟିଭିରେ ଏହି ଭିଜୁଆଲ୍ କଏଦ୍ ହୋଇଥିଲା ।
ଅନମୋଲ ଶର୍ମା ନାମକ ଏହି ନାବାଳିକା ଓ ତାଙ୍କ ପିତା ଅଶ୍ୱନୀ କୁମାର ଡେରିରେ ପ୍ଲାଟଫର୍ମରେ ପହଞ୍ଚିଥିଲେ । ସେତେବେଳକୁ ଟ୍ରେନ ପ୍ଲାଟଫର୍ମ ଛାଡିଦେଇଥିଲା । ଦୁଇଜଣ ଟ୍ରେନ୍ରେ ଉଠିବା ପାଇଁ ଚେଷ୍ଟା କରିଥିଲେ । ସେହି ସମୟରେ ୪ ନମ୍ବର ପ୍ଲାଟଫର୍ମରେ ଛିଡା ହୋଇଥିବା ଏସ୍ବି ଯୋଶ୍ କୌଣସି ବିପଦର ଆଶଙ୍କା କରି ତା ପଛରେ ଦୌଡିଥିଲେ । ପିଲାଟି ତଳେ ପଡିଯିବା ମାତ୍ରେ କୌଣସି ଅଘଟଣ ଘଟିବା ପୂର୍ବରୁ ତାକୁ ଉଠାଇ ନେଇଥିଲେ । ଏହାପରେ ଟ୍ରେନ୍କୁ କିଛି ସମୟ ପାଇଁ ରୋକା ଯାଇଥିଲା । ପିଲାଟି ସୁସ୍ଥ ଅନୁଭବ କରିବା ପରେ ସେହି ଟ୍ରେନ୍ରେ ପିତାଙ୍କ ସହ ଯାତ୍ରା କରିଥିଲା । ଆର୍ପିଏଫ୍ କନେଷ୍ଟବଳ ଏସ୍ବି ଯୋଶ୍ଙ୍କର ଏହି ଭଲକାମକୁ ସମସ୍ତେ ବେଶ୍ ପ୍ରଶଂସା କରିଛନ୍ତି । ତାଙ୍କୁ ପୁରସ୍କୃତ କରାଯିବା ବୋଲି ରେଳ ବିଭାଗର ବରିଷ୍ଠ ଅଧିକାରୀମାନେ ପ୍ରକାଶ କରିଛନ୍ତି ।
