ଗୁଆହାଟି : ଭାରତ ଓ ଶ୍ରୀଲଙ୍କା ମଧ୍ୟରେ ତିନିଟିକିଆ ଟ୍ବେଣ୍ଟି-୨୦ ସିରିଜର ପ୍ରଥମ ମ୍ୟାଚ ଆସନ୍ତାକାଲି(ରବିବାର) ଗୁଆହାଟିରେ ଖେଳାଯିବ। ଏହି ମ୍ୟାଚ ସନ୍ଧ୍ୟା ୭ଟାରେ ଆରମ୍ଭ ହେବ। ଏହି ମ୍ୟାଚରେ ଶ୍ରୀଲଙ୍କା ପକ୍ଷରୁ ଲାଶିଥ ମାଲିଙ୍ଗା ଅଧିନାୟକ ଭାର ସମ୍ଭାଳିବାକୁ ଥିବାବେଳେ ବିରାଟ କୋହଲିଙ୍କ ନେତୃତ୍ବରେ ଭାରତୀୟ ଦଳ ପଡ଼ିଆକୁ ଓହ୍ଲାଇବ। ରବିବାର ଏଠାରେ ପ୍ରଥମ ମ୍ୟାଚ ଖେଳାଯିବାକୁ ଥିବାବେଳେ ୭ ତାରିଖରେ ୨ୟ ଟି-୨୦ ଇନ୍ଦୋରରେ ଏବଂ ୧୦ ତାରିଖରେ ପୁଣେରେ ଶେଷ ଟି-୨୦ ମ୍ୟାଚ ଖେଳାଯିବ।
ଉଭୟ ଦଳ ମଧ୍ୟରେ ଏପର୍ଯ୍ୟନ୍ତ ୧୬ଟି ଟ୍ବେଣ୍ଟି-୨୦ ମ୍ୟାଚ ଖେଳାଯାଇଛି। ଯେଉଁଥିରେ ଭାରତୀୟ କ୍ରିକେଟ ଦଳ ଜବରଦସ୍ତ ଖେଳ ପ୍ରଦର୍ଶନ କରିଛି। ୧୬ଟି ମ୍ୟାଚରୁ ଭାରତ ୧୧ଟିରେ ବିଜୟ ଲାଭ କରିଛି। ସେହିଭଳି ଶ୍ରୀଲଙ୍କା ୫ଟି ମ୍ୟାଚରେ ବିଜୟୀ ହୋଇଛି। ଏହି ସିରିଜକୁ କ୍ଲିନସୁଇପ କଲେ ଭାରତ ଶ୍ରୀଲଙ୍କା ବିପକ୍ଷରେ ୧୪ଟି ଟ୍ବେଣ୍ଟି-୨୦ ମ୍ୟାଚ ଜିତିବାର ପ୍ରଥମ ଦଳ ହେବ।
