କୃଷି ଉତ୍ପାଦନ ଓ ଉତ୍ପାଦକତା ବୃଦ୍ଧି ପାଇଁ କେନ୍ଦ୍ର ସରକାର ରାଜ୍ୟମାନଙ୍କୁ ପୂର୍ଣ୍ଣ ସମର୍ଥନ ଯୋଗାଇବେ ବୋଲି କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂହ ତୋମର କହିଛନ୍ତି। ସେ କହିଛନ୍ତି, ଜଳବାୟୁ ପରିବର୍ତ୍ତନ ଓ ବର୍ଷା ଉପରେ ନିର୍ଭର କରାଯାଉଥିବା କୃଷି କ୍ଷେତ୍ରରେ ଦେଖା ଦେଇଥିବା ଚ୍ୟାଲେଞ୍ଜ ଗୁଡ଼ିକର ସମ୍ମୁଖୀନ ହେବା ପାଇଁ ମଧ୍ୟ କେନ୍ଦ୍ର ସରକାର ରାଜ୍ୟମାନଙ୍କୁ ସହାୟତା କରିବେ।
ଭିଡ଼ିଓ କନ୍ଫରେନ୍ସିଂ ମାଧ୍ୟମରେ ୨୦୨୧-୨୨ ମସିହା ପାଇଁ ରବି ଫସଲ ସଂକ୍ରାନ୍ତ ଜାତୀୟ ସମ୍ମିଳନୀକୁ ଉଦ୍ଘାଟନ କରି ଶ୍ରୀ ତୋମର ଏହା କହିଛନ୍ତି। ସେ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସବୁବେଳେ କୃଷକମାନଙ୍କୁ ସୁରକ୍ଷା ଓ ସମର୍ଥନ ଯୋଗାଇ ଦେବା ପାଇଁ ଲକ୍ଷ୍ୟ ରଖିଛନ୍ତି ଏବଂ ଏଥିପାଇଁ କୃଷକମାନଙ୍କୁ ଆତ୍ମନିର୍ଭର କରିବା ସକାଶେ ଅନେକ ପଦକ୍ଷେପ ନିଆଯାଇଛି। ପାଣି, ବିଦ୍ୟୁତ୍ ଓ ସାର ଯଥାଯଥ ଭାବେ ବ୍ୟବହାର କରିବା ସଙ୍ଗେ ସଙ୍ଗେ ନାନୋ ୟୁରିଆକୁ ଉପଯୁକ୍ତ ଭାବେ ବ୍ୟବହାର କରିବା ପାଇଁ ସେ ରାଜ୍ୟମାନଙ୍କୁ ନିବେଦନ କରିଛନ୍ତି। ନାନୋ ୟୁରିଆ ହେଉଛି ଶସ୍ତା ଏବଂ ଜମିର ଉର୍ବରତା ପାଇଁ ଉପକାରୀ।
ଶ୍ରୀ ତୋମର କହିଛନ୍ତି, କୃଷି ବିଜ୍ଞାନ କେନ୍ଦ୍ରଗୁଡ଼ିକ ସରକାରଙ୍କ ବିଭିନ୍ନ ଯୋଜନା ଗୁଡ଼ିକ ସଂକ୍ରାନ୍ତରେ କ୍ଷୁଦ୍ର ଚାଷୀମାନଙ୍କୁ ସହାୟତା କରିବାର ଆବଶ୍ୟକତା ରହିଛି। ଶ୍ରୀ ତୋମର କହିଛନ୍ତି, ପି.ଏମ୍. କିଶାନ୍ ଓ କିଶାନ୍ କ୍ରେଡିଟ୍ କାର୍ଡ ସବୁ କୃଷକମାନଙ୍କ ପାଖରେ ଯେଭଳି ପହଞ୍ଚିବ ତାହାକୁ ରାଜ୍ୟମାନେ ନିଶ୍ଚିତ କରିବାର ଆବଶ୍ୟକତା ରହିଛି। ଏପର୍ଯ୍ୟନ୍ତ ୨ କୋଟି ୨୫ଲକ୍ଷ କିଶାନ୍ କ୍ରେଡିଟ୍ କାର୍ଡ ବଣ୍ଟନ କରାଯାଇଛି ଏବଂ କୃଷକମାନଙ୍କୁ ୨ କୋଟି ୨୫ଲକ୍ଷ ଋଣ ଯୋଗାଇ ଦିଆଯାଇଛି ବୋଲି ଶ୍ରୀ ତୋମର କହିଛନ୍ତି। ଶ୍ରୀ ତୋମର କହିଛନ୍ତି, ପ୍ରଧାନମନ୍ତ୍ରୀ ଫସଲବିମା ଯୋଜନା କୃଷକମାନଙ୍କୁ ସୁରକ୍ଷା ଯୋଗାଇ ପାରିଛି।
