ହୋଲିରେ ହତ୍ୟା – ତିଗିରିଆରେ ସ୍ୱାମୀ ମୃତ, ସ୍ତ୍ରୀ ଏବଂ ଝିଅ ଗୁରୁତର

ତିଗିରିଆ- ରକ୍ତ ରଞ୍ଜିତ ହୋଇଛି ତିଗିରିଆ । ତିଗିରିଆ ଥାନା ଅନ୍ତର୍ଗତ ନୂଆପାଟଣା ଗ୍ରାମ ସୁରେନ୍ଦ୍ରପାଟଣାରେ ଘଟିଛି ହତ୍ୟାକାଣ୍ଡ । ଗୋଟିଏ ପରିବାରର ତିନି ଜଣଙ୍କୁ ଧାରୁଆ ଅସ୍ତ୍ରରେ ଆକ୍ରମଣ । ଏଥିରେ ବାପାର ମୃତ୍ୟୁ ହୋଇଥିବାବେଳେ ମାଆ ଓ ଝିଅ ଗୁରୁତର ଥିବାରୁ ସେମାନଙ୍କୁ କଟକ ବଡ଼ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଛି । ମିଳିଥିବା ସୂଚନା ମୁତାବକ ସୁରେନ୍ଦ୍ରପାଟଣା ଗ୍ରାମର ଚିନ୍ତାମଣି ବେହେରା (୫୦) ଙ୍କର ପରିବାରକୁ ଏହି ଆକ୍ରମଣ ହୋଇଛି ।

ଆକ୍ରମଣକାରୀମାନେ ଉକ୍ତ ସୁରେନ୍ଦ୍ରପାଟଣା ଗ୍ରାମର ଗୋଟିଏ ପରିବାର ବାପ ଓ ୩ପୁଅ, ଏହି ୪ଜଣ ମିଶି ସଂଘବଦ୍ଧ ଭାବେ ବୁଧବାର ସକାଳେ ବିଭିନ୍ନ ଧାରୁଆ ଅସ୍ତ୍ରରେ ଚିନ୍ତାମଣିଙ୍କ ପରିବାରକୁ ଆକ୍ରମଣ କରିଥିଲେ । ଚିନ୍ତାମଣିଙ୍କ ପରିବାର ସଦସ୍ୟଙ୍କ ଚିତ୍କାର ଶୁଣି ପଡୋଶୀ ଲୋକେ ସେମାନଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ଆଠଗଡ଼ ଉପଖଣ୍ଡ ଡ଼ାକ୍ତରଖାନାକୁ ପଠାଇ ଥିଲେ । ଡାକ୍ତରଖାନାରେ ଡାକ୍ତର ଚିନ୍ତାମଣିଙ୍କୁ ମୃତ ଘୋଷଣା କରିଥିବା ବେଳେ ପତ୍ନୀ ରଶ୍ମିତା ଏବଂ ଝିଅ ମିନତୀ ଗୁରୁତର ଥିବାରୁ ସେମାନଙ୍କୁ କଟକ ବଡ଼ ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଛି । ଖବର ପାଇ ଘଟଣାସ୍ଥଳରେ ତିଗିରିଆ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି। ଆକ୍ରମଣକାରୀମାନେ ଫେରାର ଥିବା ବେଳେ ଥାନା ପୁଲିସ ୨ ଜଣ ମହିଳାଙ୍କୁ ଥାନାରେ ଅଟକ ରଖି ପଚରା ଉଚରା ଜାରି ରଖିଛି । ତେବେ ହତ୍ୟାକାଣ୍ଡର ପ୍ରକୃତ କାରଣ ବିଷୟରେ ପୁଲସି କୌଣସି ସୂଚନା ଦେଇ ନାହିଁ ।

Comments are closed.