ବରଗଡ : ବରଗଡ ଡେବ୍ରିଗଡ ଅଭୟାରଣ୍ୟରେ ବାଘ ମୃତ୍ୟୁ ମାମଲାରେ କ୍ରାଇମବ୍ରାଞ୍ଚ ଟିମ ତଦନ୍ତ ଆରମ୍ଭ କରିଛି। ସୋମବାର ଦିନ ଏନଟିସିଏ ଟିମ ଡେବ୍ରିଗଡରେ ପହଞ୍ଚିଛି। କ୍ରାଇମବ୍ରାଞ୍ଚ ଡିଏସପି ବିଳାସିନୀ ନାୟକଙ୍କ ନେତୃତ୍ବରେ ଏକ ଟିମ ତଦନ୍ତ ପାଇଁ ଘଟଣାସ୍ଥଳରେ ପହଞ୍ଚିଛନ୍ତି। କ୍ରାଇମବ୍ରାଞ୍ଚ ଟିମ ଡେବ୍ରିଗଡ ଜଙ୍ଗଲକୁ ଯାଇ ସମସ୍ତ ଘଟଣାର ତଦନ୍ତ କରିଛନ୍ତି। ଏହି ମାମଲାରେ ବନ ବିଭାଗ ୪ଜଣଙ୍କୁ ଗିରଫ କରିଛି। ସେମାନଙ୍କ ଠାରୁ ବାଘର ନିଶ, ପଞ୍ଝା ଓ ମୃତ ବାଘର ଅବଶେଷ ଜବତ ହୋଇଛି। ଅଭିଯୁକ୍ତମାନେ ନିଜର ଅପରାଧ ସ୍ବୀକାର କରିଥିବା ବରଗଡ ଡିଏଫଓ ସୂଚନା ଦେଇଛନ୍ତି।
ସୂଚନାଯୋଗ୍ୟ ଯେ, ବରଗଡ ଦେବ୍ରିଗଡ ଜଙ୍ଗଲରୁ ଅକ୍ଟୋବର ୨୮ତାରିଖରେ ଏକ ବାଘର ଗଳିତ ମୃତଦେହ ଉଦ୍ଧାର ହୋଇଥିଲା। ଅଭିଯୁକ୍ତମାନେ ବାରହା ଶିକାର ପାଇଁ ବିଦ୍ୟୁତ ଫାଶ ପକାଇଥିବା ବେଳେ ସେଥିରେ ମହାବଳ ବାଘ ପଡି ଯାଇଥିଲା ବୋଲି କହିଛନ୍ତି। ବିଦ୍ୟୁତ୍ ସଂସ୍ପର୍ଶରେ ଆସି ବାଘଟି ମରିଯିବା ପରେ ସେମାନେ ବାଘର ନିଶ, ଦାନ୍ତ, ପଞ୍ଝା, ନଖ କାଟି ନେଇ ପାଖରେ ଏକ ଗାତ ଖୋଳି ଅବଶିଷ୍ଠାଂଶ ପୋତିଦେଇଥିଲେ। ତେବେ ପ୍ରାୟ ୧୫ ଦିନ ପରେ ୨୮ ତାରିଖ ଦିନ ବାଘଟି ମରିଥିବା ଜଣାପଡ଼ିଥିଲା। ବାଘଟି ଯେଉଁଠି ମରିଥିଲା, ତାର ୫୦୦ ମିଟର ଦୂରରେ ଅଭିଯୁକ୍ତ ଗୌର ମିର୍ଦ୍ଧା କପଡ଼ାରେ ଘୋଡ଼ାଇଥିବା ୪ଟି ନିଶ, ପଞ୍ଝା ଏବଂ ଜାକିରା ଟୁଡୁଠାରୁ ୩ଟି ଦାନ୍ତ, ନିଶ ଜବତ ହୋଇଥିଲା।