ଆଲିଗଡ଼ : ଉତ୍ତରପ୍ରଦେଶ ଆଲିଗଡ଼ର ତପ୍ପଲା ସହରରେ ଏକ ଅଢେଇ ବର୍ଷର ଶିଶୁକୁ ବର୍ବର ଭାବେ ହତ୍ୟା କରାଯିବା ମାମଲାରେ ପୁଲିସ୍ ଶନିବାର ମୁଖ୍ୟ ଅଭଯୁକ୍ତ ଜାହିଦର ପତ୍ନୀ ଓ ଭାଇକୁ ଗିରଫ କରିଛି। ଶୁକ୍ରବାର ପୁଲିସ୍ ଜାହିଦ ଏବଂ ତାର ସାଥି ଅସଲମକୁ ଗିରଫ କରିଥିଲା । ପୁଲିସ୍ କହିବା ଅନୁସାରେ ଜାହିଦ ଏବଂ ଅସଲମ ହେଉଛନ୍ତି ପେସାଦାର ଅପରାଧୀ। ଅସଲମ ନାମରେ ନିଜ ଝିଅ ସହ ଦୁଷ୍କର୍ମ, ଅପହରଣ ଭଳି ୫ଟି ମାମଲା ରହିଛି।
ସେପଟେ ମୃତ ଶିଶୁର ପରିବାର ଲୋକେ ଅଭିଯୁକ୍ତଙ୍କୁ ଫାଶୀ ଦେବାକୁ ଦାବି କରିଛନ୍ତି। ଅଭିଯୁକ୍ତଙ୍କୁ ୨୪ ଘଣ୍ଟା ମଧ୍ୟରେ ପାଶୀ ଦିଆନଗଲେ ସେମାନେ ସମୂହ ଆତ୍ମହତ୍ୟା କରିବେ ବୋଲି ଚେତାବନୀ ଦେଇଛନ୍ତି।
ପୀଡ଼ିତ ପରିବାର ଲୋକଙ୍କୁ ନ୍ୟାୟ ଦେବା ଦାବିରେ ଶୁକ୍ରବାର ସନ୍ଧ୍ୟାରେ ସହସ୍ରାଧିକ ଲୋକ ବିଭିନ୍ନ ଅଞ୍ଚଳରେ ମହମବତୀ ଶୋଭାଯାତ୍ରା କରିଥିଲେ। ଓକିଲମାନେ ଜାହିଦ ଏବଂ ଅସଲମର ମାମଲା ଲଢିବାକୁ ମନା କରିଦେଇଛନ୍ତି। ଶିଶୁର ଦାଦା ସହ ୧୦ ହଜାର ଟଙ୍କା ନେଣଦେଣ ବିବାଦରୁ ଏହି ହତ୍ୟାକାଣ୍ଡ ଘଟିଥିବା କୁହାଯାଉଛି। ବ୍ୟବଚ୍ଛେଦ ରିପୋର୍ଟରୁ ଶିଶୁ ସହ ବଳାତ୍କାର ହୋଇନଥିବା କୁହାଯାଉଛି। ତେବେ ମୃତ ଶିଶୁର ବାପା ବଳାତ୍କାର ପରେ ହତ୍ୟା କରାଯାଇଥିବାର ସନ୍ଦେହ ବ୍ୟକ୍ତ କରିଛନ୍ତି। ବ୍ୟବଚ୍ଛେଦ ରିପୋର୍ଟ ଅନୁସାରେ ଶିଶୁ ଶରୀରରେ କିଡ଼ନୀ ଏବଂ ଗୁପ୍ତାଙ୍ଗ ନାହିଁ। ତେଣୁ ବ୍ୟବଚ୍ଛେଦ ରିପୋର୍ଟ ଉପରେ ସନ୍ଦେହ ବ୍ୟକ୍ତ କରାଯାଇଛି।
ପ୍ରକାଶ ଯେ ଏହି ଘଟଣାରେ ୫ ଜଣ ପୁଲିସ କର୍ମଚାରୀଙ୍କୁ ନିଲମ୍ବିତ କରାଯାଇଛି । ନାବାଳିକାର ହାତ କାଟି ଦେବା ସହ ତାହାର ଆଖିକୁ ତାଡି ଅତି ବର୍ବର ଭାବେ ହତ୍ୟା କରାଯାଇଥିଲା । ନାବାଳିକା ନିଖୋଜ ହେବା ପରେ ଘର ଲୋକ ଥାନାରେ ଅଭିଯୋଗ କରିଥିଲେ । ଟଙ୍କା ଧାର ଘଟଣାକୁ ନେଇ ଏହି ଅଭିଯୁକ୍ତମାନେ ନାବାଳିକା ଶିଶୁର ପରିବାର ଉପରେ ରାଗ ରଖିଥିଲେ । ପରେ ଶିଶୁଟିକୁ ବର୍ବର ଭାବେ ହତ୍ୟାକରି ଏକ ଡଷ୍ଟବିନ୍ ରେ ଫିଙ୍ଗି ଦେଇଥିଲେ । କୁକୁରମାନେ ଏକ ଶିଶୁର ଶରୀରକୁ ଝୁଣି ଖାଉଥିବା ସ୍ଥାନୀୟ ଲୋକ ଦେଖିବା ପରେ ପୁଲିସକୁ ଖବର ଦେଇଥିଲେ । ଏହାପରେ ହତ୍ୟାକାଣ୍ଡ ଘଟଣାର ପର୍ଦ୍ଦାଫାସ ହୋଇଥିଲା ।
Comments are closed.