ଭୁବନେଶ୍ୱର: ବ୍ୟାଙ୍କ ଅଫ୍ ମହାରାଷ୍ଟ୍ରର ଅନାଦେୟ ଋଣ ହ୍ରାସ ଓ ମୋଟ୍ ସୁଧ ଆୟରେ ବୃଦ୍ଧି ଘଟିବା ସହ ସେପ୍ଟେମ୍ବର ୨୦୨୨ ଶେଷ ସୁଦ୍ଧା ନେଟ୍ ଲାଭ ଦ୍ୱିଗୁଣିତ ହୋଇ ୫୩୫କୋଟିରେ ପହଞ୍ଚିଛି । ବ୍ୟାଙ୍କର ସେୟାର ଶତକଡା ୪.୭୪ ପ୍ରତିଶତ ବୃଦ୍ଧିରେ ରହିଥିବା ସହ ବିଏସ୍ଇରେ ଏହାର ସେୟାର ପିଛା ମୂଲ୍ୟ ୧୮.୮ଟଙ୍କା ରହିଛି । ବ୍ୟାଙ୍କର ମୋଟ୍ ଆୟ ୪,୩୧୭ କୋଟିରେ ପହଞ୍ଚିଛି ଯାହା ପୂର୍ବ ବର୍ଷ ଏହି ସମୟରେ ୪,୦୩୯କୋଟି ରହିଥିଲା । ବ୍ୟାଙ୍କର ନେଟ୍ ଇଣ୍ଟରେଷ୍ଟ ମାର୍ଜିନ୍ (ଏନ୍ଆଇଏମ୍) ଶତକଡା ୩.୨୮ପ୍ରତିଶତରୁ ୩.୫୫ପ୍ରତିଶତକୁ ବୃଦ୍ଧି ପାଇଛି । ବ୍ୟାଙ୍କର ନେଟ୍ ସୁଧ ଆୟ ଶତକଡା ୨୬ ପ୍ରତିଶତ ଅଭିବୃଦ୍ଧି ହାର ହାସଲ କରି ୧,୮୮୭ କୋଟି ଟଙ୍କାରେ ପହଞ୍ଚି ପାରିଛି ଯାହା ପୂର୍ବ ବର୍ଷ ଏହି ସମୟରେ ୧,୫୦୦ କୋଟି ଟଙ୍କା ଥିଲା ।
ସେପ୍ଟେମ୍ବର ୨୦୨୨ ଶେଷ ସୁଦ୍ଧା ବ୍ୟାଙ୍କର ଗ୍ରସ୍ ଏନ୍ପିଏ ଶତକଡା ୫.୫୬ ପ୍ରତିଶତରୁ ହ୍ରାସ ପାଇ ଶତକଡା ୩.୪୦ ପ୍ରତିଶତରେ ପହଞ୍ଚିଛି । ବ୍ୟାଙ୍କର ନେଟ୍ ଏନ୍ପିଏ କିମ୍ବା ଅନାଦେୟ ଋଣ ଶତକଡା ୧.୭୩ ପ୍ରତିଶତରୁ ହ୍ରାସ ପାଇ ଶତକଡା ୦.୬୮ ପ୍ରତିଶତରେ ପହଞ୍ଚିଛି । ୩୦ସେପ୍ଟେମ୍ବର ୨୦୨୨ ସୁଦ୍ଧା ବ୍ୟାଙ୍କର ପ୍ରୋଭିଜନ୍ କଭରେଜ ରେସିଓ ଶତକଡା ୯୨.୩୮ ପ୍ରତିଶତରୁ ଶତକଡା ୯୬.୦୬ ପ୍ରତିଶତକୁ ବୃଦ୍ଧି ପାଇଛି । ଦ୍ୱିତୀୟ ତ୍ରୟମାସ ପାଇଁ ବ୍ୟାଙ୍କର ଅନାଦେୟ ଋଣ ବ୍ୟବସ୍ଥା ପୂର୍ବ ବର୍ଷ ଏହି ସମୟରେ ୯୨୨ କୋଟି ଟଙ୍କା ରହିଥିବା ବେଳେ ଏହା ହ୍ରାସ ପାଇ ୫୩୨ କୋଟି ଟଙ୍କାରେ ପହଞ୍ଚିଛି । ସେପ୍ଟେମ୍ବର ମାସ ସୁଦ୍ଧା ବ୍ୟାଙ୍କର ପରିଚାଳନାଗତ ଲାଭ ୪.୪୩ ପ୍ରତିଶତ ବୃଦ୍ଧି ଘଟିଛି । ବ୍ୟାଙ୍କର ପରିଚାଳନା ନିର୍ଦ୍ଦେଶକ ଏବଂ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଏ .ଏସ୍. ରାଜୀବ କହିଛନ୍ତି ଯେ, ବ୍ୟାଙ୍କର ପୁଞ୍ଜି ସ୍ୱଚ୍ଛଳତା ହାର ଶତକଡା ୧୨.୮୯ ପ୍ରତିଶତରୁ ଶତକଡା ୧୬.୭୧ ପ୍ରତିଶତକୁ ବୃଦ୍ଧି ପାଇଛି । ଶ୍ରୀ ରାଜୀବ କହିଛନ୍ତି ଯେ, ଗୃହ ଋଣ ମାର୍କେଟ ସେୟାରରେ ବୃଦ୍ଧି ଘଟାଇବା ପାଇଁ ବ୍ୟାଙ୍କ ପକ୍ଷରୁ ଗୃହ ଋଣକୁ ହ୍ରାସ କରାଯାଇଛି । ବ୍ୟାଙ୍କର ସିଡି ଅନୁପାତ ଶତକଡା ୬୩.୪୭ ପ୍ରତିଶତରୁ ବୃଦ୍ଧି ପାଇ ଶତକଡା ୭୫.୬୯ ପ୍ରତିଶତରେ ପହଞ୍ଚିଛି । ଚଳିତ ଆର୍ଥିକ ବର୍ଷର ପ୍ରଥମ ଭାଗରେ ବ୍ୟାଙ୍କ ଅତିରିକ୍ତ ଟାୟାର ୧ ବଣ୍ଡ୍ ୭୫୦କୋଟିକୁ ବୃଦ୍ଧି କରିଛି ।
