ଆରଏସଏସ ନେତାଙ୍କ ଉପରେ ଆତଙ୍କବାଦୀ ଆକ୍ରମଣ ଆଶଙ୍କା, ଗୁଇନ୍ଦା ସୂଚନା ପରେ ବଢ଼ିଲା ସୁରକ୍ଷା

ନୂଆଦିଲ୍ଲୀ: ରାଷ୍ଟ୍ରୀୟ ସ୍ବୟଂସେବକ ସଂଘ(ଆରଏସଏସ) ନେତାମାନଙ୍କ ଉପରେ ଆତଙ୍କବାଦୀ ଆକ୍ରମଣ ବିପଦ ରହିଛି। ଆରଏସଏସ ନେତା ଏବଂ ସଂଘର କାର୍ଯ୍ୟାଳୟଗୁଡ଼ିକ ଆତଙ୍କବାଦୀଙ୍କ ଟାର୍ଗେଟରେ ରହିଥିବା ଗୁଇନ୍ଦା ସୂଚନା ମିଳିଛି। ବିଶ୍ଵ ସ୍ତରର ଆତଙ୍କୀ ସଂଗଠନ ଆଇଇଡି ଅଥବା ଆଇଇଡି ଭର୍ତ୍ତି କୌଣସି ଯାନ ଦ୍ବାରା ଆକ୍ରମଣ କରିପାରନ୍ତି ବୋଲି ଗୁଇନ୍ଦା ରିପୋର୍ଟରେ ଦର୍ଶାଯାଇଛି। ଏହି ସୂଚନା ମିଳିବା ପରେ ଆରଏସଏସର ବରିଷ୍ଠ ନେତା ଏବଂ କାର୍ଯ୍ୟାଳୟରେ ସୁରକ୍ଷା ବ୍ୟବସ୍ଥାକୁ ବଢ଼ାଇ ଦିଆଯାଇଛି। ସଂଘର ନେତା ଏବଂ କର୍ମକର୍ତ୍ତାମାନେ ମଧ୍ୟ ସତର୍କ ହୋଇଯାଇଛନ୍ତି।

ରିପୋର୍ଟରେ ଦର୍ଶାଯାଇଛି ଯେ, ମହାରାଷ୍ଟ୍ର, ପଞ୍ଜାବ, ରାଜସ୍ଥାନ ଆଦି ରାଜ୍ୟରେ ଆତଙ୍କବାଦୀମାନେ ସଂଘ ନେତା ଓ କାର୍ଯ୍ୟାଳୟ ଉପରେ ଆକ୍ରମଣ କରିପାରନ୍ତି। ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ଏହି ଗୁଇନ୍ଦା ସୂଚନା ମିଳିବା ପରେ ମହାରାଷ୍ଟ୍ର, ଦିଲ୍ଲୀ, ପଞ୍ଜାବ, ରାଜସ୍ଥାନ, ଉତ୍ତରପ୍ରଦେଶ ଏବଂ ଆସାମରେ ଥିବା ସଂଘ କାର୍ଯ୍ୟାଳୟ ପରିସରରେ ସୁରକ୍ଷା ବ୍ୟବସ୍ଥା ବୃଦ୍ଧି କରାଯାଇଛି। ସଂଘର ନେତାମାନଙ୍କ ସୁରକ୍ଷାର ମଧ୍ୟ ସମୀକ୍ଷା କରାଯାଉଛି।