ଚେନ୍ନଇ : ତାମିଲନାଡୁର ପୁଦୁକୋଟ୍ଟାଇ ଜିଲାରେ ଦୁର୍ବୃତ୍ତମାନେ ମଙ୍ଗଳବାର ବିଶିଷ୍ଟ ସମାଜସେବୀ ପେରିୟାର ରାମସ୍ୱାମୀଙ୍କ ଏକ ପ୍ରତିମୂର୍ତ୍ତି ଭାଙ୍ଗିଦେଇଥିବା ଜଣାପଡିଛି। ପୁଲିସ ଏ ଘଟଣାରେ ଅଜଣା ବ୍ୟକ୍ତିଙ୍କ ନାମରେ ମାମଲା ରୁଜୁ କରି ତଦନ୍ତ ଚଳାଇଛି। ୨୦୧୩ରେ ଡିଏମକେ ନେତା କେ.ଭିରାମଣି ଏହି ପ୍ରତିମୂର୍ତ୍ତି ସ୍ଥାପନ କରିଥିଲେ। ଆଇନ ଶୃଙ୍ଖଳା ବଜାୟ ରଖିବାକୁ ଘଟଣାସ୍ଥଳରେ ବ୍ୟାପକ ପୁଲିସ ମୁତୟନ କରାଯାଇଥିବା ପ୍ରକାଶ। ପୂର୍ବରୁ ତାମିଲନାଡୁର ଅନ୍ୟ ଏକ ଜିଲାରେ ମଧ୍ୟ ପେରିୟାରଙ୍କ ପ୍ରତିମୂର୍ତ୍ତି ଭଙ୍ଗାଯାଇଥିଲା। ତ୍ରିପୁରାରେ କମ୍ୟୁନିଷ୍ଟ ନେତା ଲେନିନ୍ଙ୍କ ପ୍ରତିମୂର୍ତ୍ତି ଭଙ୍ଗା ଘଟଣା ପରଠାରୁ ଦେଶର ବିଭିନ୍ନ ସ୍ଥାନରେ ବିଶିଷ୍ଟ ବ୍ୟକ୍ତିଙ୍କ ପ୍ରତିମୂର୍ତ୍ତିକୁ ଭାଙ୍ଗିବା ସହ କେତେକ କ୍ଷେତ୍ରରେ ସେଗୁଡିକୁ ରଙ୍ଗ ବୋଳି ବିକୃତ କରାଯାଇଛି।
