ନୂଆଦିଲ୍ଲୀ: ନିର୍ବାଚନ ସମୟରେ ପ୍ରତି ମତଦାନ କେନ୍ଦ୍ରର ଭିଡିଓ ରେକର୍ଡିଂକୁ ସଂରକ୍ଷିତ କରି ରଖିବାକୁ ସୁପ୍ରିମକୋର୍ଟ ନିର୍ବାଚନ ଆୟୋଗ (ଇସି)ଙ୍କୁ ଶୁକ୍ରବାର ନିର୍ଦେଶ ଦେଇଛନ୍ତି। ପ୍ରଧାନ ବିଚାରପତି ସଞ୍ଜୀବ ଖାନ୍ନା ଓ ବିଚାରପତି ସଞ୍ଜୟ କୁମାରଙ୍କୁ ନେଇ ଗଠିତ ପୀଠ ଇନ୍ଦୁ ପ୍ରକାଶ ସିଂହଙ୍କ ପକ୍ଷରୁ ଦାୟର ଜନସ୍ବାର୍ଥ ମାମଲା (ପିଆଇଏଲ୍)ର ଶୁଣାଣି କରି ଏହି ନିର୍ଦେଶ ଦେଇଛନ୍ତି। ମତଦାନ କେନ୍ଦ୍ରରେ ଭୋଟ ଦେଉଥିବା ଭୋଟରଙ୍କ ସଂଖ୍ୟାରେ ଅହେତୁକ ବୃଦ୍ଧିକୁ ନେଇ ସିଂହ ଚାଲେଞ୍ଜ କରିବା ପୂର୍ବକ ପିଆଇଏଲ୍ ଦାୟର କରିଥିଲେ। ସିଂହ ତାଙ୍କ ଆବେଦନରେ ଦର୍ଶାଇଥିଲେ ଯେ ଜଣେ ଭୋଟର ଗୋଟିଏ ଇଭିଏମ୍ରେ ମତଦାନ କରିବାକୁ ୬୦ରୁ ୯୦ ସେକେଣ୍ଡ ସମୟ ନେଇଥାନ୍ତି। ଗୋଟିଏ ଦିନରେ ୧୧ ଘଣ୍ଟା ମତଦାନ ହୋଇଥାଏ। ଏହି ହାରରେ ଗୋଟିଏ ମତଦାନ କେନ୍ଦ୍ରରେ ଗୋଟିଏ ଇଭିଏମ୍ରେ ସର୍ବାଧିକ ୬୬୦ ଭୋଟର ମତଦାନ କରିପାରିବେ। ମାତ୍ର କେତେକ ମତଦାନ କେନ୍ଦ୍ରରେ ୧୨୦୦ରୁ ୧୫୦୦ ଭୋଟର ମତଦାନ କରିବା ଭଳି ତଥ୍ୟ ଆସୁଥିବାରୁ ସିଂହ ଏହାକୁ ଚାଲେଞ୍ଜ କରିଛନ୍ତି।
Popular Categories
Previous article
Next article