ଦେଶରେ ପର୍ଯ୍ୟାପ୍ତ ଗହମ ମହଜୁଦ

ନୂଆଦିଲ୍ଲୀ : ଦେଶରେ ପର୍ଯ୍ୟାପ୍ତ ପରିମାଣର ଗହମ ମହଜୁଦ ଅଛି; ତେଣୁ ସରକାର ବିଦେଶରୁ ଗହମ ଆମଦାନୀ କରିବେ ନାହିଁ ବୋଲି ରବିବାର ଖାଦ୍ୟ ଓ ସାଧାରଣ ବଣ୍ଟନ ବିଭାଗ କହିଛି। ସରକାର କହିଛନ୍ତି ଯେ ଭାରତ ଖାଦ୍ୟ ନିଗମ (ଏଫସିଆଇ)ଙ୍କ ନିକଟରେ ପର୍ଯ୍ୟାପ୍ତ ଗହମ ମହଜୁଦ ଅଛି; ଯାହା ଦେଶର ଆବଶ୍ୟକତାକୁ ପୂରଣ କରିପାରିବ। ତେଣୁ ଆବଶ୍ୟକତା ପୂରଣ ପାଇଁ ବିଦେଶରୁ ଗହମ ଆମଦାନୀ କରାଯିବାର ନାହିଁ। ଦେଶରେ ଗହମ ଅଭାବ ରହିଛି ତେଣୁ ସରକାର ବିଦେଶରୁ ଗହମ ଆମଦାନୀ କରିବା ନେଇ ଗଣମାଧ୍ୟମରେ ପ୍ରକାଶିତ ରିପୋର୍ଟ ଉପରେ ପ୍ରତିକ୍ରିୟା ରଖି ସରକାର ଏପରି କହିଛନ୍ତି। ଜୁଲାଇ ମାସରେ ଦେଶର ଏଫସିଆଇ ନିକଟରେ ୧୩୪ ଲକ୍ଷ ଟନ୍ ଗହମ ମହଜୁଦ ରହିଥିଲା। ଚଳିତ ବର୍ଷ ଦେଶରେ ଖାଦ୍ୟଶସ୍ୟର ଉତ୍ପାଦନ ହ୍ରାସ ପାଇଛି। ଦେଶରେ ଖାଦ୍ୟ ଶସ୍ୟ ଉତ୍ପାଦନ ପ୍ରାୟ ୩% ହ୍ରାସ ପାଇବା ଆକଳନ କରାଯାଇଛି। ପଞ୍ଜାବ ଓ ହରିୟାଣାରେ ଗ୍ରୀଷ୍ମ ପ୍ରବାହ ଯୋଗୁଁ ଗହମ ଉତ୍ପାଦନ ମଧ୍ୟ ହ୍ରାସ ପାଇବା ଆକଳନ କରାଯାଇଛି। ୨୦୨୧-୨୨ରେ ଦେଶର ରେକର୍ଡ ପରିମାଣର ୭ନିୟୁତ ଟନ୍ ଗହମ ରପ୍ତାନୀ କରିଥିଲା।

Comments are closed.