କନ୍ଧମାଳ: ଚକାପାଦ ବ୍ଲକ ବସ୍ତିଙ୍ଗିଆ ସେବାଶ୍ରମର ଜଣେ ଛାତ୍ର ପାଣିରେ ବୁଡି ମୃତ୍ୟୁ ଘଟିଥିବା ମାମଲା ପ୍ରଧାନଶିକ୍ଷକ ନିଲମ୍ବିତ ହୋଇଛନ୍ତି । ଦୁଇ ଦଳ ଅଧିକାରୀ ଟିମ ପୃଥକ ଭାବେ ତଦନ୍ତ କରିବା ପରେ ଜିଲ୍ଲାପାଳ ଆଜି ପ୍ରଧାନଶିକ୍ଷକ ଧିରେନ୍ଦ୍ର କୁମାର ତ୍ରିପାଠୀଙ୍କୁ ନିଲମ୍ବନ କରିଛନ୍ତି । ଏହି ମାମଲାରେ ସୁପରଟେଣ୍ଟଙ୍କ ପ୍ରତି ଦୃଢ କାର୍ୟ୍ୟାନୁଷ୍ଠାନ ନିଆଯିବାର ସମ୍ଭାବନା ରହିଛି ।
ସୂଚନାଯୋଗ୍ୟ, ଗତ ୨୦ ତାରିଖରେ ବସ୍ତିଙ୍ଗିଆ ସେବାଶ୍ରମର ୩ ଜଣ ଛାତ୍ର ନିକଟସ୍ଥ ଏକ କେନାଲକୁ ଗାଧୋଇବାକୁ ଯାଇଥିଲେ । ଅସାବଧାନତା ବଶତଃ ସେମାନଙ୍କ ମଧ୍ୟରୁ ଜଣଙ୍କର ପାଣିରେ ବୁଡି ମୃତ୍ୟୁ ଘଟିଥିଲା । ଏହାକୁ ନେଇ ଉତ୍ତେଜନା ପ୍ରକାଶ ପାଇବା ସହ ପୁଅକୁ ହତ୍ୟା କରାଯାଇଥିବା ନେଇ ପରିବାର ପକ୍ଷରୁ ଅଭିଯୋଗ ହୋଇଥିଲା । ମୃତ ଛାତ୍ରଙ୍କ ନାମ ହେଲା ପ୍ରତ୍ୟୁଷ ଏବଂ ସେ ଷଷ୍ଠ ଶ୍ରେଣୀରେ ପଢୁଥିଲେ ।
